Jowai : Ki artylli ki seiñbhalang wa kynthup ya ka Meghalaya People United Front wa ka Khasi Jaiñtia National Union ha ka 2 tarik da lai yachem ki wa ki heh ka kharkhana pynmih khyndawbilat wa em ha East Jaiñtia ha ophis krehkaam u Deputy Commissioner wei da yaklam hajrong ki kattu katni tylli ki phang kam ki wym ye ki karkhana u e khih e kreh ya ki tre chnong katkam ka rai (agreement) kamwa 60% cha ki. Katwa ki ar seiñ da chem ki wa da thung duna ya kamwa 20% donhi.
Da kyntu leh ya ki company wow pynbna paidbah næ advertise ya kawon kawon ka kaam wa lait, ki tre chnong toh u chah jied nyngkong ki, lada ha ka technical, electrical, mechanical, labour wa kiwi kiwi, wei ki karkhana ymtoh u yoobeiñ ki ya ki, kamjooh leh da kyntu wow pynhiar hadooh 30% chi churia i bai khyndawbilat hapoh ka jylla.
Da dawa ki leh na ki karkhana wow pait yeiwa emkaam hapoh ki chnong ki thaw yow kynrong yei yoh ki paidbah, wei wow booh ya ki hospital, ki skur wei wow e ya ki scholarship cha ki khynnah skur kiwa wan na ki manyung wa dooh.
“Em ki mat kiwa ki karkhana ym ye ki u jubab wei u Deputy Commissioner da ong u ya i wow lai yaklam wa ki bor kiwa hajrong, tangwa ym emkaam wow ong u DC kamni neibhah i tip i jar jiar i kaamram yong i” da ong ki ar seiñ.
“Lada ki kharkhana khyndawbilat leh bha ki ya ki bru yong i kamwa da kam ha ka yalang, tæ neiyi i daw wa u DC wa ki heh Kharkhana chirup wa i ym chah ki wow lai sylli i ya ki kharkhana yong ki, han lada ym chah ki, i daw thooh laad i wow mih ki luti wow lai sylli i ki” da ong u President ka MPUF ma D.Laloo wa u President ka KJNU ma N.Shadap.
Ya kani ka yalang da khut hadien wa ujor ki tre chnong wa ki tre thaw heiwa em kini ki karkhana ha East Jaiñtia, da ong leh wa ha u Naichiphaw 2015 da e dorkhat ya kini ki karkhana wow pynche yeini tangwa man i iwa sepai hadooh wa duk u paan yarap na u Deputy Commissioner ka East Jaiñtia heiwa da khut u ya kani ka yalang.
Discussion about this post