Kam chibynta i pynkhreh ya ka 6th Meghalaya Games 2025 kawa daw man ha Jowai, West Jaiñtia Hills, ynne ka sngi u Deputy Commissioner, u B.S. Sohliya da khut pynman yalang u ya kiwa mihkhmat na ki chnat krehkaam sorkar, ki thaw puræ, kiwa yahkhmat chnong wa ki dkhot ka Meghalaya State Olympic Association (MSOA) kamjooh kiwa mihkhmat naka chnat Sports ka sorkar jylla wa kiwi de.
Ha ka yalang wa da pynman ha Conference Hall ka chnat Divisional Soil & Water Conservation Jowai, u Khroobok Passah, Asst. Director Sports and Youth Affairs uwa man leh u District Sports Officer, West Jaiñtia Hills da pynsñiaw u ya ki thaw wa da jied neibynta u pynman ya ka Meghalaya Games ha ki jait yalehke waphær waphær.
Hadien wa da kut ka yalang, neiliang u DC khana u wa lyngba ini i yachemlang da ya klam bniah bha ki hajrong kammon u pynman ya ka Meghalaya Games kawa jop wei kawa lai bait lai ryntih.
Wei heijooh i por ong u wa ini toh yow pynyoo ya i naam i burom yong ka imlang sahlang kamjooh leh ka riti dustur wa heiyatoh ki thaw uiñke suwari
Napoh ka Meghalaya State Olympic Association (MSOA) da em u Working President, u John F Kharshiiing, u General Secretary, u F.L. Pariat, neitæ u Assistant Director, Sports and Youth Affairs, u Paia B War Nongbri wa kiwi.
Discussion about this post