Ki MDC ka Garo Hills Autonomous District Council ynne da yachem ki wa u montri rangbah ka jylla u Conrad Sangma yow dawa u pynsmat wow yoh yaka muhor na u Lat ka jylla heiyatoh waka Garo Customary Law Bill kawa dang yang yei mynjur na u Lat.
Ki MDC wa yahkhmat da u CEM ka GHADC u Dipul Marak deiwa emlang ki dkhot ka Drafting Committee da yachem ki wa u montri rangbah ha i thaw sah u ha Tura yow paan yei yarap yong oo yow pynman aiñ smat ya kani ka Bill. I yachem da pynman ynne i step heipor 10 waje.
Ya kani ka Bill da mynjur da ka Executive Committee wa da yahkhmat daka NPP ha u snem 2018 hadien i yaklam hapyrdi kiwa boon hapoh ri-loom Garo. Tangwa da mih i khñium ya kiwon ki jaitbru wa ye u kheiñ kam ki jaitbru Garo namo ki ‘Achik Mande’. Waroh 29 ngut ki MDC da e ki yei mynjur yong ki hawa wanrah ya kani ka Bill.
Hawa klam yei mynjur ya kani ka Bill, u EM u Augustine Marak da ong u wa da mynjur ya kani ka Bill hadien wa da yoh yei pynsñiaw na kiwa boon ki bru kamjooh ki seiñ na ri-loom Garo. Hanla em wa pyrchah ya kani ka Bill, 24 na ki 25 tylli ki seiñ ka thaaiñ kiwa kmen yei mynjur ya kani ka Bill.
