I em ki luti syngkieñ wa biang deilang waka Internet toh kiwa emkaam bha ha ka juk wa katni wei yow pynbiang ya ini hapoh Meghalaya, ki 6 ngut ki MLA wa dang khynroo ka jylla Meghalaya da yachem ki wow ya phyllu yumut wa u MP ka ri Germany, u Florian Müller dei thong wow pynbiang ya kini ki ar jait hapoh ka jylla.
Kini ki 6 ngut ki MLA ka Meghalaya kynthup ki ya u Montri ka chnat Sports & Youth Affairs, u Shakliar Warjri, ka Santa Mary Shylla, u Damanbait Lamare, u Charles Marngar, u Ian Botham Sangma wa u Gabriel Wahlang kiwa da klam hajrong ka phang ‘Digital Connectivity’ wa ‘Transport in India,’ deiwa klam kyrpang ya ka jylla Meghalaya deiwa emlang leh u Dr. Adrian Haack uwa mihkhmat ya ka Germany hapoh India hapoh ka Konrad-Adenauer-Stiffung, New Delhi.
Neiliang u Florian Müller da klam u yei emyatoh ki luti syngkieñ waka juk Digital wei kawi emkaam ko ya kawi yow lai bait i krehkaam. Da ong u wa ha ka juk wa katni i ku wei kylla thymme ki luti syngkieñ da yarap ko leh wow pynsmat yei poi ki mar cha kylleiñ ka pyrthai.
U Müller da ban joor u yei emkaam wow em ya ka Digital Connectivity wa miat wa kynthup ya ka Transportation Management Systems, Traffic Monitoring and Control wei i biang i ye wow yaklam kiwa yah kari wa kiwa chong kari.
Neiliang ki MLA ka Meghalaya da pynsñiaw ki yei wym biang ki luti syngkieñ hapoh ka jylla hanla ka jylla da dap ko la 50 snem tangwa boon ki chnong ympu em sarok ki.
U Shakliar Warjri won da ong u wa ha ka jylla ha kini ki 5 snem da sdang miat ki sarok deiwa ban joor wa emkaam wow pynlut poisa yow chna ya iwa emkaam yow ku ka Meghalaya.
