U sarok wa jrong 10 Km uwa nadooh ka chnong Pdengshakap hadooh ha Amlarem, West Jaiñtia Hills District uwa da mang tangka da ka sorkar jylla hei lut wa kamwa Rs. 8 klur neibynta u pynchna siang moo, siang psiang biang heiwa i kreh leh u sdang noh i, kamtæ ynne ka sngi neiliang ki waheh chnong yong ki 36 tylli ki chnong ka War East wa lai luti uni u sarok, da yachem yaklam ki wa u Contractor uwa da pynkreh ya uni u sarok, u Friday Hinge ha Community Hall ka chnong Pdengshakap.
Ha ini i yachem da emlang u Dolloi ka Elaka Satpator, u Daman Lakashiang, kiwa yahkhmat chnong wa kynthup ya u K. Pohshna, waheh chnong Pdengkarong uwa man leh uwa e buit ka Synjuk Waheh Chnong War Jaiñtia, u Kampher Pohlong, Secretary Synjuk Waheh Chnong Amlarem Sub-Division uwa man leh u waheh chnong ka Amlarem, u Savio Buam, waheh chnong ka Pdengshakap, u Lamdibok Sumer, waheh chnong ka Trangblang wa kiwi kiwi de ki waheh chnong.
Neiliang u Friday Hinge hawa yaklam wa ki waheh chnong da kyntu u ya ki kamjooh leh ki paidbah wow yakrehlang ki neibhah kat danglai i kreh boi daw mih iwon iwon i wit i thut næ i bakla kamtæ kyntu u wow pyntip chwa cha oo, wei da kular u leh wow kreh bha ya uni u sarok.
Ki waheh chnong wa e i klam ha kani ka sngi leh da pynsñiaw ki yei smat u yakrehlang deiwa kyntu ya ki para wa yahkhmat chnong wow ya pait bniahlang ki hajrong i pynkreh ya uni u sarok.
Discussion about this post