Ynne ka sngi hadien wa kut ya ka yalang ‘Deputy Commissioner Level Joint Border Meeting’ hapyrdi u DC ka West Jaiñtia Hills wa ka West Karbi Anglong ha Conference Room ka yung krehkaam Soil and Water Conservation Office, Jowai da em leh i yachem yong kiwa mihkhmat paidbah na ki ar liang ka jylla.
Ha ini i yachem da wan chimbynta u CEM ka JHADC, u Thombor Shiwat, ki Executive Member wa kynthup ya u Winning Sungoh wa u A. Darnei katwa neiliang ka Assam won da wan chimbynta u (Dr) Mansing Rongpi MLA -20 Baithalangso (ST) LAC wa ki dkhot Executive Member ka Karbi Anglong Autonomous Council (KAAC).
Hadien wa kut kani ka yachem hawa yaklam wa u Thombor, da ong u wa kani ka yachem toh wow pynyoo wa da em i yaklam hapyrdi ki ar liang wei ymye wow pynbait ya i kaam pood du ha chisien chong donhi, wei i yaklam toh u pteiñ i wot hapyrdi ki bor wa hajrong.
Da ong u leh wa dei langær jooh pynsñiawthooh hapyrdi ki ar liang, ka West Jaiñtia wa ka Karbi Anglong wow pynneh ya ka Status Quo heiwa ynne da pynsñiaw u ha ka yachem wa ha kini wadep da em i chna sarok na Assam cha Meghalaya, wei hajrong ini lada em i pyntip ki ya ki bor chnong namo ki bor District chwa wow leh yeini.
Chooh chooh u Thombor da kdaw u wa heipor wa chna ya u sarok PMGSY ha Khanduli, Mokiram wa kiwi kiwi da phah sangeh yei kreh ki bor ka Assam (Karbi Anglong) deiwa kam wa emkaam u pynneh ya ka Status Quo wei neiliang ki bor ka Assam da jubab ki ynne wa i kreh ha ki sarok wa katni toh wow chna pynmiat (Repair) ya ki sarok wa da em chwa wei ini ym toh iwa ye u pdiang.
Heijooh i por da kdaw u wa em iwi i thaw ka JHADC wa em ha Khanduli kawa da biang ki kot ki sla wei heipor wa thmu wow pynkreh ya kani ka khloo da chah wan kem ki bru wakreh wei da chah pynchitom ki ha ki bor ka Assam (Karbi Anglong) deiwa daiñ kuna ya ki yeiwa ki bor ka Karbi Anglong leh ynne da kular ki wa ini ym jia de i neini chaphrang.
Da ong u leh wa ynne da rai wa emkaam u chong yalang kam kani neipor cheipor khnang wow pyrkhat wow leh yeiwa emkaaam.
