Ki 10 ngut kiwa na Ladakh da yoh ki wow yachem wa u Union Home Minister u Amit Shah ynne ka sngi yow pynsñiaw yeiwa emkaam wow pynneh pynsah yaka ktien ka thylliej yong ki, ka dustur riti, i khyndaw u chyiap ka Ladakh kamjooh leh wow wanrah yaka roi ka paar.
Neiliang u Amit Shah da pyntip u wa hapoh i yahkhmat u Prime Minister u Narender Modi, ka sorkar pyrdi ka man ko kawa yaleh wow pynku yaka Ladakh wei wow pynneh yaka dustur riti wa ki thaw ki bhaw ka Ladakh.
Heiwa deiwa pynman yaka Ladakh kam ka Union Territory, ka sorkar da pynyoo ko yei thmu yow pynbiang yeiwa dawa ki bru ka Ladakh kiwa da slem.
Ha kani ka yalang da rai wow chna daka Committee hapoh i yahkhmat u Union Minister of State for Home, u G.Kishan Reddy heiwa daw man dkhot leh ki dkhot wa wan na Ladakh, ki dkhot ka LAHDC, kiwa jooh mihkhmat yaka chnat ka sorkar India kamjooh ki bor pynlai yaka Ladakh.
Neiliang kiwa wan yachem wa u Shah da ong ki wa neidaw wa ka Ladakh man ko kawa em ki thaw kiwa chitom wow lai wow poi kamjooh iwa emkaam yaka ri, emkaam ko wow yoh yei yada kamjooh ki kaam pynroi, u pynneh yei khih i khan kamjooh wow yada ya ki bru heiwa da em ka yakhih hajrong ini hachwa ka LAHDC Election.
