Kiwa yahkhmat ka niam Christan na Shillong hapoh ka Khasi Jaintia Christian Leadership Forum (KJCLF) da yachem ki wa u Lat ka jylla u Satya Pal Malik ha Raj Bhavan, Shillong ynnin ka sngi wa kynthup ya u Rev. EH Kharkongor, Secretary ka Khasi Jaintia Christian Leaders Forum, Rev. Fr. Richard Majaw, Vicar General ka Shillong Archdiocese, Rev. Himanshu Christian, Presbyter ka All Saints Cathedral, Church of North India Shillong wa u RO Wallang, waheh ka Balang Presbyterian.
Kini da ekti ki ya ka chithi cha u Lat kawa ong wa ka niam Christan da man ko kam chibynta i rukom im wa ha i parom ka ri India la 2000 snem kattu, wei ki yung krehkaam wa ki bru Christan da leh ki chiboon neibynta ka ri wei da pteiñ ki yeini kam ha ki kaam puræ puthi, i chait i khiah wa kiwa tlot bor ha ka imlang sahlang.
Da kdaw leh wa ki Christan ha India toh kiwa khian paaid bha kiwa em du 2.3% na waroh i boon bru hapoh ka ri wei da im ki dei suk dei saaiñ wa waroh kiwa chong chnong kamjooh kiwi ki niam.
Tangwa da em ki kaam wa da leh pyrchah ya ki Christan nadooh i chah thombor, i chah pynmynsoo, ha kylleiñ ka ri ha kini ki 20 snem wa da lai iwa da joor bha katni.
Ha kiwa boon ki bynta ka ri da sakhi yei chah tba kti pyn ha kiwa chong chnong nadooh i chah pynmynsoo, i chah pynyap ki bru wa kreh ha ka niam kam ki Missionary wa ki Pastor, i chah beh nei thaw yong ki da kiwa heh paaid, i chah tympra ki thaw mane kamjooh ki tiar ki tar wa kyntang, hadooh wow pynmih hukum da ki sorkar yow khanglaad ya kiwa chong chnong u jied laitlooid ki ya ka niam wa ngait ki.
Kamtæ da ong wa ki kaam pynmynsoo wa ki kaam yachoon hap sangeh noh i wei kam kiwa chong chnong hapoh ka ri emkaam wow im deiwa yasuk yow wanrah yei yoh kyrmen kamjooh ya ka mynried wa tyrchaaiñ ya ka ri.
Kamtæ dei sñiawkhia da kyntu ya u Lat wow pynsñiaw yeini cha ki khlieh ka ri waka jylla kamwa da pynyoo u yei kyrchaan ini wadep yei yakhih ki warep.
Neiliang u Lat da pynsñiaw u yei mynjur yeini i kwah yei suk wei da kular u leh wow pynsñiaw yeini cha ki heh ka ri.
