U Montri Rangbah ka jylla, u Conrad K Sangma ynnin ka sngi da lai chimbynta u ha ka CM Connect Programme kawa man kam ka yalang wow yachem paidbah ha ki Block kawa da pynman ha Kurkalang Football Ground, Lumdaitkhla, Bhoirymbong.
Kani da man ko ka sien wa ar wa da pynman kam kani ka yachem yow e laad ya ki paidbah wow pynsñiaw ki yei eh i khoo, i ood i naam neibynta ki bru wa em ha ki Block.
Neiliang ki paidbah da pynsñiaw ki yei sih ki sarok, ka puræ puthi, ka umkor, ka bordiñ, i rep i riang wa kiwi kiwi de.
U Conrad da ong u wa da pynman ya kani ka yalang yow pynyajan wa ki paidbah wei wow sñiaw da ki chkoor yei eh wa maad ki deiwa pynrap wa hawa chna Scheme hap u chna hei dur wa emkaam ki paidbah wei deiwa wan yachem kamni daw tip iyi u leh.
Ki paidbah da pynsñiaw ki leh yei eh heiyatoh waka Jal Jeevan Mission (JJM), iwa duna ha ka puræ puthi wei i sih u sarok VIP Road wei kamjooh wow e yarap ya kiwa duna hei doh i pran.
Da dawa leh ya ka Civil Sub Division ha ka thaaiñ neibhah da jngai ware ya ki wow lai ki cha Shillong wa Nongpoh. Da klam leh yei wym biang bordiñ wa ki kaam khappood najrong kiwi kiwi de.
Neiliang u Conrad kamjooh ki sahep sorkar da jubab ki yeiwa kylli ki paidbah wei da kular leh wow chimkhia yeini waroh.
Ha kani ka yalang da saam leh ya ki Cheque kam chibynta ka Community Fund cha ki Community Based Organisation (CBO), CLF wa VO hapoh ka NRLM Community Investment Fund (CIF) cha ki Kynthupiang Cluster Level Federation, Kyrdem kiwa em 31 tylli ki SHG.
Ka Community Investment Fund (CIF) da e cha 36 tylli ki VO wa 129 tylli ki SHG katwa ka Vulnerability Reduction Fund da e cha ki 8 tylli ki VO.
Da pynlait leh 11 tylli ki Bolero Pickup cha kiwa yoh myntoi hapoh ka CM Elevate ha kani hi ka yalang.
Discussion about this post