Yachem u DC ya ka CCIB wa ki BSF heiyatoh wei ker pood India-Bangladesh

Jowai : Ynne ka sngi ka Coordination Committee on International Border (CCIB), ki bor District West Jaintia Hills hapoh u Deputy Commissioner wa ki heh BSF ki da yachem ki ha kamra Conference ka ophis u DC ha Jowai yow ya phyllu yumut yei ker ya u pood u ang ka India wa ka Bangladesh.

Neiliang ka CCIB da mihkhmat da u Chairman wa u Secretary yong ka deilang wa ki dkhot ka FKJGP, u Joe Marwein, u GH Kharshanlor, HNYF deilang wa kiwi kiwi kiwa yahkhmat ya ki seiñbhalang. Neiliang ka BSF da em u 2^nd IC (Op), u SR Khan wa ki Deputy Commandant kiwa kynthup ya u Bijender Kumar, Venkatesh wa u Movi. E Zingkhai da emlang leh ki Sordar Chnong wa ki Waheh Chnong.

Hei yaklam wa kiwa thoh khubor hadien wa kut i yalang, neilaing u ma G.H. Kharshanlor, uwa man leh u Spokesperson ka CCIB, ong u wa ka CCIB yieñ ko hajrong i nongrim wow pyntikna chwa ya u pood u ang kamjooh ya ki morcha chwa u ker ya u pood. Neibhah ka sorkar hadooh katni leh ympu ye ko u pynhun yei kwah ki paidbah. Ki paidbah kwah leh ki wa u kær ya u pood nadooh na tre u morcha yow lait ki thaw na Meghalaya u lai cha Bangladesh.

Neiliang u Deputy Commissioner ong u wa ya u pood u kær katwa ye u pynjan cha u morcha wei u pyntikna u leh wa ha West Jaiñtia ym em ki yung wow haap cha kylla wa kær ya u pood. Kwah u leh u pynsñiawthooh cha ki paidbah wa ym em itea i No Man’s Land namo ki khyndaw wa ym em tre wa ye u kam tre næ u yooh kjat neibhah ya ki hali wa ki thaw rep ki bru wa em cha kylla i ker pood ki bru napoh Meghalaya ye ki u pynemkaam deiwa psiah cha ki na ki gate wa chna ha ini i kær pood.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Da ong u leh wa ka BSF daw yang ko ya kini ki thaw rep waroh 24 kynta yow lait kiwa na Bangladesh u wan tooh ya ki mar rep ki bru Meghalaya. Da ong u leh wa yow pynsmat yei pynbait ya u pood u ang daw pynman leh sa kawi ka survey deiwa emlang ki seiñ wa boon, ka JHADC, ka CCIB, BSF, ki tre thaw wa kiwi kiwi wadaw chah ktah na ini i ker pood. I thmu kani ka survey toh yow pyntikna ya ki kattu katni ki morcha wa em leh kiwa da wiar wei da chah kit ha ka um.

Katwa neiliang ki bru wa sah cha khapood dang boon wa pyrchah ya ini i kær pood neidaw wa ym em chaniah ki ya ki BSF u yada ya ki thaw yong ki wa em cha kylla i kær pood wei kwah ki leh lada ka India kær ko ya u pood ka Bangladesh toh u kær ko ya u pood yong ka.

Heijooh i por neiliang u DC ka West Jaiñtia Hills da kular u wa i kær yow pood u man i du chi ratap wei ym baam i yei thaw paidbah neibhah katkam wa man katni yow pood de kær le ratap iwa kynthup ya ki jar u narchieh wa ki nar biang.