Kam chibynta i pyrchang wow thooh ki laad ki luti wow pyndooh yei eh kawa yatoh wa i jhep haka chnong Jowai, ka Jowai Municipal Board (JMB) hapoh i yahkhmat yong u Chairman yong ka, u L.D. Lakiang da li yah ki ya kiwa yahkhmat chnong cha ka Waste Recovery Centre yong ka chnong Umpling, Shillong.
Hawa klam yahkhmat u Wompher Shadap, Capacity Building Specialist, SBM Urban PMU, Urban Affairs Department da batai u chaphang kani ka Waste Recovery Centre kawa da pynlai daka Dorbar Chnong Umpling. Da ong u wa kani toh ka nongmuna yong itæ i Decentralization of Waste Recovery namo ka rukom pynbait yei jhep kawa ki chnong ye ki u leh ha jar jiar ki chnong. Da ong u wa ka chnong Umpling em ko kamwa 2300 tylli ki manyung kiwa pynmih kamwa san ton i jhep man-ka-sngi wei na kini, soophaw naka chispah toh i jhep wa pyut (Biodegradable), khatsan Percent won naki wa ye wow pynemkaam biang (Reusable) wei lephawsan naka chispah won toh kiwa ye u pynkylla thymme biang (Recyclable). Da pynche u leh wa ka aiñ ym chah ko wow noh jhep kiwa pyut lane ki wym ye u kop diñ wot ha ki thaw noh jhep leh.
Kamwa man katni, kani ka Centre dang leh ki du wow pynkylla sboh yei jhep wa pyut kiwa mih naka chnong Umpling wei da ong u wa ym toh iwa suk neibhah wa ka chnong da em chwa ko yaka rukom wa kiwa chong chnong pynyakhlaad ki yei jhep nadooh na yung hi. Kawa phylla toh wa wot ya ini i pynkylla sboh yei jhep heini deiwa leh da ka Vertical Composting ym em pynmih ko ya iwon iwon i sma.
Neiliang yong u Banbhalang Diengdoh uwa man uwi na ki khynroo wa pynkreh ya ini i kaam wow pynkylla sboh yei jhep ha kani ka Centre, da batai u chaphang ka rukom kawa ki leh ki wei kamjooh leh ki kynja dawai wa pynemkaam ki. Da ong u wa waroh ki dawai kiwa pynemkaam kam ka Lacto Acid Bacteria (LAB), u Indigenous Microorganism (IMO), ka Fish-Amino Acid, ka Oriental Herbal Nutrient (OHN), Fermented Plant Juice (FPJ), Fermented Fruit Juice (FFJ), Bamboo Vinegar wa kiwi kiwi toh kiwa da chna hi.
U Dr. H.H. Mohrmen naka SURE uwa da embynta waka JMB wow thooh ki laad ki luti yow pyndooh yei eh wa ka chnong Jowai da yachem ko hawa yatoh wa i jhep, da ong u wa ka JMB deiwa ya krehlang wa ka SURE deilang waka Young Minds Collective da kynjoh ktien ki leh ya ki Company na Bangalore ka Saahas Zero Waste wow yarap hei wow pynjem yeini i eh. Neiliang yong ka JMB wa kini ki seiñ da pynkhreh ki wow pynman yei lai pynche hawa yatoh wa i emkaam u pynkhlaad yei jhep na ki yung ha waroh kawi ka chnong Jowai.
Neiliang yong u L.D. Lakiang uwa man u Chairman yong ka JMB da pynsñiaw u yei sñiawngooh ya ki wakreh yong ka Swachh Bharat Mission Urban yong ka Urban Affairs wa ki Waheh Chnong na ki chnong waphær waphær ha Jowai wa kynthup ya u Alan Niangti, President ka Synjuk ki Waheh Chnong Jowai. Da kyrmen u leh wa ini i lai pait ya kani ka thaw pynkylla sboh daw yarap ko wow wai yei rukom pyrkhat kiwa da ya emlang. Da e khublei leh ya ki seiñ kiwa ya krehlang waka JMB neibynta wow pynbait yeini i eh.
Najrong ki wakreh ka JMB kiwa kynthup ya u S. Amse, Junior Engineer, u H. Passah Assistant Engineer wa kiwi de kiwa da ya emlang toh ka Larisa Mary Lakadong, IEC Specialist SBM Urban Urban Affairs Department, Shillong, u Ajoy Lywait Waheh Chnong Tympang Iawmusiang, u Chaniah Huwa naka chnong Tyndo wapung, u Job Kawlni naka Seven Day Adventist University wa kiwi kiwi.
