Jowai: Ka Shangpung man ko kawi na ki chnong kawa da pawnaam bha ha West Jaiñtia Hills wei da man ko leh kam ka Model Village heiyatoh wa i khooid i jngiar wei ha kani ka kynti leh ha ka yakhun pyrchah ya ka khlam u COVID-19 ka chnong leh da yahkhmat biang ko wow bood ya ka Social Distancing namo wow jngai iwi na iwi.
Ynne ka sngi man ko ka sngi heiwa da wai ya ki dukan dukdoh wa em hapoh ki chnong wa em ha West Jaiñtia Hills (WJH) heiwa ki dukan da wai ki 3 kynta nadooh 9:00 i step hadooh 12:00 i sngi.
Katkam wa man hi ha kiwa boon ki chnong hapoh WJH ki paidbah ymye ware ki wow bood ya ka Social Distancing tangwa manda kyruiñ won cha Shangpung da chem wa ki bru da yieñ jngai ki iwi na iwi wow yang ya ka pali yong ki wow thied ya ki tiar wa emkaam ki na ki dukan dukdoh.
Chwa wow psiah ha kawi na ki dukan da booh ya ka um wa i sabon-um (hand wash) heiwa ki Volunteer wa da thung ka chnong da yarap ki wow pynjoo sabon wei wow saitkti kiwa wan thied tiar.
Chooh chooh iwa rap yoosuk dooh toh wa ki bru da man ki kiwa jai-jai ym em i tieñsar næ jhan neibhah da sakhi ya uwi u bru uwa dang ah doh sniang wei ym em ki bru wa lang ya oo wei kiwa boon hi dang yang bait ki ya ka pali yong ki wow thied tiar wa emkaam ki na ki dukan wa wai.
Discussion about this post