Jowai: Man i ka khubor wa sñiawsuk wow yoh u yoo u sñiaw wei kawa ye leh u e mynsien ya ki khon ka Ri-loom Jaiñtia khamtam ya ki khon khynroo khyllood ha kani ka juk wa chitom u yoh khih yoh kreh khamtam ki kreh sorkar, heiwa neiliang u Wyrta ha kani ka tayaw da yoh u wow booddien yei lai luti uwi u manpa uwa na ka chnong Mihmyntdu wow kyruiñ wow sdang u khih u kreh yei kaam wa ñiaar wow em ki bru Pnar u leh ki, itæ toh hei wow lai tyrwa chana khriaw-khriaw cha ki yaw ki haat ki dong ki chnat ka Jowai.
Uni u manpa toh u Leki Phawa uwa em 3 ngut ki khon wa dang khian, man u leh uwi na ki Pnar wa nyngkong wow chim yei khih lai tyrwa chana cha ki yaw ki haat man-ka-sngi yow pyndap pynbiang yei emkaam ka yung ka sem yong oo.
Nyngkong, u Leki im u nei lai kreh mistri, kamtæ hei yachem yumut u wa ki lok cha wah cha neiñ da rai u wow sdang lai tyrwa dai chana. Haka sngi wa sdang da chem u wa yoh hi ya ka nong kamwa lai kreh mistri neitæ nawon da pyrchang noh u wow pynbiang wow chna ya ki tiar ki tar yow pna chet ya ki chana ha yung, wei kamwa liwan yung hei janmiet man-ka-sngi da thied chana u chi kilo chi jait neibynta wow pynkhreh ya ka sngi wa bood.
Hei lai luti yong oo ha kani ka kreh, man-ka-sngi dang step khai u yow pynkhreh yei chet i tu kam u chana kule, chana badam, u bujhia, chana dai, wei pynbiang leh ki piat, u sohjaw, dahania waki sla-pachor wow song chana. Sdang won u wow mih na yung heipor 10:30 – 11:00 waje deiwa sap leh ya ka riam (Uniform) rong yirngam kawa da pynkhreh u pyn da oo hi iwa em leh yei yumut deiwa ong u “Yei rong yirngam da pynsyriem O kamwa khai lung ki dieñ ki phlang, yooluti O wa i khih i kreh yong nga u khai lung i”.
Man u leh u bru wa leh khooid leh pliah nadooh i rukom chet i sait i khlieñ ha yung, wei wot hadooh hakhmat ki paidbah wa thied kamjooh. Man-ka-sngi hadien wa poi yung leh sait u ya ka tin rah chana, ka mask, ka apron wa kiwi kiwi ki tiar wa pynemkaam u.
Hei yaklam wa u Leki, da khana u wa la kamwa chi snem da lai luti u ha kani ka khih ka kreh, wei nachwa man-ka-sngi jooh lai psiah u cha ki yung krehkaam sorkar waphær waphær tangwa hadien wa wan ka khlam COVID-19, ym em de yoh u wow lai cha kini ki yung krehkaam kiwa khlan bha u thied chana na oo.
Da ong u leh wa em u i thrang i angnood wow pynku pynheh chooh chooh yeini i khih wei u chet leh ya kiwa boon ki jait baam, tangwa chem chitom u heiyatoh wa ka poisa poilaiñ, neibhah wa emkaam u wow pynbiang ya chiboon ki tiar, wei hadooh kamwa man kattæ ympu em yoh yarap u neiwon neiwon leh.
U Leki da pynsñiaw u leh yei kmen wa du hadien kattu katni por wa sdang u yeini i khih, u pyrsa yong oo chirup wa u boo yong oo leh da sdang ki ya kani kajooh ka khih.
Heijooh i por da kyntu u ya ki pra Pnar khamtam ki khon khynroo khyllood wymhoi u sarom hawa khih ya iwon iwon i jait kreh han man i leh iwa khian deiwa pynchlur leh wow kreh wow chimkhia ki hei sap wa em ki neibhah i kreh i khih yong i dahi man i iwa laitlooid.
Kut wa lai dai chana, u Leki Phawa mih u dei kjat wei dai tymbud luti nadooh na Mihmyntdu, Ladthadlaboh, cha Iawthymme kamtæ hiar won u cha Iawmusiang wei lai psiah cha ki dukan dukdoh kiwa jooh ka-it u thied chana na oo, da uiñ u cha ki thaw pynyieiñ kari, psiah u cha ka Iaw Chor wa cha kiwi kiwi ki bynta ka Iawmusiang.
Chooh chooh neiliang u Wyrta da yoh laad u leh wow yaklam wa ki katu katni ngut ki bru wa da myllien u thied chana na oo, heiwa da pynsñiaw ki yei sñiaw jngiar wow thied chana na u Leki bar na ki Dkhar neibhah wa oo man u u bru wa leh pliah wei biang ki laad yada hajrong wa i rukom khleh yong oo leh man i iwa bang.
