Ka skur Jawahar Navodaya Vidyalaya (JNV) wa em ha chnong Mukhla, West Jaiñtia Hills District toh kawi napyrdi ki 22 tylli ki skur hapoh ka jylla Meghalaya wada yoh i tipmit naka sorkar pyrdi wow man kam kiwa yahkhmat hajrong wow pynkrehkam yaka National Education Policy 2020, wei ka JNV Mukhla daw yahkhmat ko yaka West Jaiñtia Hills District kawa em ya soo tylli ki Block wa kynthup ka Laskeiñ, Thadlaskeiñ, Amlarem waka Namdong Block.
Kani ka skur yoh ko leh i kyrchaan poisa lyngba ka Scheme Pradhan Mantri Schools for Rising India neibynta u pynbiang pyntoh yei emkaam katkam i kwah kani ka Policy khnang wa ki skur hapoh West Jaiñtia Hills u ye yoh yarap næ yoh sikai hajrong ka National Education Policy, neibhah wa ka thong yong ka hi toh u pynku yei stat i tip wa salonsar haki paidbah wa chong chnong ka ri India.
Hei yaklam wa u Principal ka skur JNV Mukhla, u N. Kumar ynne ka sngi kawa man leh ka sngi kynmoo burom ki yei dap 3 snem pura kani ka Policy, khana u wa kam ka skur JNV kawa da pynkrehkaam ya kani ka Policy chem u wa yarap wei kmen bha ki khynnah skur kamjooh ki bei ki pa, neibhah wa ki khynnah poi sakhiat ki cha ka thong wada angnood ki.
Heiyatoh wei rukom pynkrehkaam ya kani ka Policy ha kani ka skur, ong u wa da pyrchang ki wow pait bniah katkam i ye ki khynnah skur khnang yow ye ki u poi cha ka thong wa ka sap wa em ki.
Khana haroh u wa ki khynnah puræ kani ka skur da yoh bynta ki haki jait Course waphær waphær wa kynthup kam ka CHNC Computer Hardware and Network Administrator, ka e sikai wa mynkna wei ki khynnah wa rap duna hei tip Computer leh yoh sakhiat ki yei i stat.
Neitæ kamwa kani ka skur toh kawa yahkhmat u pynkrehkam yaka NEP ha West Jaiñtia Hills, ong u wa em bait ki i yajan wa u Deputy Commissioner ka West Jaiñtia Hills neibhah toh u Chairman yong ki, kamjooh ka District School Education Officer deiwa pyntip bait cha ki yei wada leh kamjooh iwa daw leh chakhmat.
Khana u wa da dep pynbait leh ya ki thaw wow man pdeiñ namo ka Hub for Learning neibynta ki skur waphær waphær wow wan chimbynta yow yoh i sñiawthooh hajrong ka NEP, najrong wow saam kylliang yei stat i tip. Neibhah boi ye u man iyi wa em ha JNV kiwi ki skur ym em ki, wei iyi wym em ha JNV ha kiwi won ki skur em ki wei kini kynthup la heiyatoh waka yung skur wa kiwi wa emkaam nadooh ki yaleh Sports wa kiwi.
Daw em leh ka bynta wow ya li pait kylliang ki khynnah naki skur waphær waphær wa kiwa puræ ha JNV, kamjooh kiwa sikai JNV u lai ki cha ki skur waphær neibynta u e mynsien wei saam kylliang yei stat i tip.
Kiwa sikai kani ka skur toh kiwa da chah pynpliah hajrong kammon u sikai yaki khynnah katkam ka NEP hajrong kammon u yoh ki yei sikai wa rap phær yow yoh myntoi ki khynnah.
Da pynrap haroh u deiwa ong hawa kiwa sikai toh kiwa da dep pynpliah, ki khynnah skur leh ye ki u leh bha haka thong wada mang ki.
Kamtæ kyntu u ya ki skur waphær waphær u yakrehlang ki waka JNV neibynta i stat i tip ki khynnah haki liang waroh wei kamjooh ka mynried yong ki u tyrchaaiñ ko.
Ha kani ka sngi da wan emlang wa kiwa sikai ka Ummulong Presbyterian College.
Discussion about this post