Yahluti ha North East Adventist University wow pynyoo yei man yatylli

Ka North East Adventist University (NEAU) ynne ka sngi da pynman ko ya ka sngi yatylli ka ri namo ka National Unity Day ha pchem yong kani ka skurbah wa em ha Khliehtyrchi, West Jaiñtia Hills heiwa u Principal Secretary ka Arts and Culture ka jylla, u FR Kharkongor da man u kam u kongsan.

Ynne da man ko i dap 150 snem ka sngikha u Sardar Vallabhbhaai Patel uwa da man u chrot wa wanrah ya ki palat 500 tylli ki hima wow wan ki chirup ha kawi ka satri wow man ka ri India.

U FR Kharkongor hawa e i klam da ong u wa mar psiah u ha pchem kani ka University da yoo u wa em kiwa riam tynre na kylleiñ ka thaaiñ iwa pynksan sakhiat ya i man kyrpang kani ka ri.

Da ong u wa kani ka sngi man ko ka wow sahkynmoo wei wow heh wow kmai ha ki sngi wa ki por wow wan dei sñiawkmen wow yoo wa kani ka skur da heh da phooh ko kat dang lai i por neibhah kamwa arphaw snem nachwa da wan wai u ya ka Library ko.

Chooh chooh da ong u wa ka India wa man ko katni toh wa ye u Sardar Vallabhbhai Patel wow wanrah ya ki hima khian wow synroplang ki wa ka ri.

Da ong u leh wa i yatylli man iwa khroo, neibhah i kyntien ong i wa lada kwah u lai smat lai samen tangwa lada kwah wow lai jngai emkaam wow lai chirup deilang.

Heijooh i por da ong u wa lada kiwa wan cheini wan ki dei jooh i riam pynyoo i yei man samen tangwa deiwa wan da ki riam tynre pynyoo wei khana ko ya ki parom yong i tre yong phi wei ini pynphooh i ya i yachemlang.

Da yaroh u ya ka University wa da lehwarom ko ya ka National Unity Day dei ngaitskem wow man kiwa yahluti ya kiwa boon wow bood ki neibhah i wan ki khynnah na ki jaitbru na kylleiñ pynyoo sakhiat i ya i yatylli.

Da pynchongkun ya ka sngi da ki chaad kam ka Kaipeng Dance (Tripura), Wangala Dance (Garo), Chawnglaizawn wa Cheraw Dance (Mizoram), Bagurumba Dance (Assam), Anal Naga Dance (Manipur-Nagaland) wa i Chaad Thma wa Chaad Pliang (ki Khasi ki Pnar).

Da yoh leh i klam na u Derald Bhengra, Chief Financial Officer, METAS Unit, u Dr. Maireiwon Ningshen, HOD ka Political Science, NEAU wei da chim ya ki kyntien kular National Unity Day Pledge.