Jowai: Ynne ka sngi uwi na kiwa chong chnong yong ka Ri-Loom Jaiñtia uwa chong wa sah ha Mukhla, WJHD u Niman Shadap da pynsñiaw u yei yaroh wei kyrchaan yaka Synjuk ki Waheh Shnong, Jowai hajrong i pyrchah yong ki wow kyrriah ya ka PWD Jowai North.
U Shadap hei yaklam wa ki laad pathai khubor ynne ka sngi, da pynsñiaw u yei sñiawdiaw hajrong ini i leh ka sorkar, heijooh i por da ong u wa ha-o i wai næ wanrah ya kiwon kiwon ki myntoi hapoh ki chnong ki thaw man ko kawa emkaam bha wa man i i myntoi wa i kyrkhu ya kiwa chong chnong, tangwa hawa leh ya kini ym toh wow pyndooh næ kyrriah ya kiwa da em chwa tangwa toh u chna næ wanrah da kiwa thymme.
Chooh chooh u Shadap da beiñ u leh ya u MLA ka Jowai u W. Shylla neidaw wym nood u wow klam hapoh ka yung dorbar hajrong kani ka kaam. U Shadap da pynkynmoo u leh wa ha i por wa man MLA u S. Mulieh da dep wow rah ya ka Civil Hospital cha Ialong kawa man i dooh ka chnong Jowai kawa man u budloom yong ka Ri-Loom Jaiñtia, sa iwi leh da pynkynmoo u wa uwi uwa yahkhmat uwa man MDC ka JHADC u P. Dkhar wa haka 18-04-2019, da dep u wow tyrwa wow kyrriah yaka yung krehkaam ka JHADC cha Sabamuswang, wei ye u man wa ini leh daw man kaam ko, kamtæ lada jia kamni daw wanrah ko ya i dooh nong ya ka Jowai wa ya ki paidbah wa chong chnong ka WJH.
Da ong u wa katkam i kular ka sorkar wa ha i thaw yong ka PWD North, daw wanrah da ka Mini Secretariat ka wym ye u man heiwa du yaka Iawmusiang waka kaam saam um na Umgot leh dang sahteiñ ki da ki phaw snem ym ye wow pyndep, kamtæ da nood ki wow koob wow wanrah ya ka Mini Secretariat.
Neiliang u Shadap da ong u wa ini toh wow pynkhyrngiat ya kiwa chong chnong yong ka Jowai, deiwa ong wa da dep kyntu chwa ya ki paidbah nadooh ki por nachwa wa ha chwa wow jied ya kiwa mihkhmat, toh u jied da kiwa chynna jngai, kiwa chemphang wa ki wym chah pynbor næ pynbiej ha kiwi, khnang wa kam kini kiyi kiyi ym jia ki.
Also Read: Ieh noh u Niman Shadap ya ka kaam President ka KJNU
