U waheh chnong warim ka Ummlong, u SS Langi da ong u wa katkam ka Paragraph 11 ka Sixth Schedule wei katkam wa da ebor ka aiñ JHADC, (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act 2015 kawa da ong hapoh ka Section 32 kani ka aiñ wa da khang pyrchah wow pynyaphær (Discriminate) ya ki bru hapoh ka chnong lada hei ngait niam, ka kur ka jait namo ka thaw wa kha/chong chnong nyngkong wa kiwi kiwi heiwa emkaam wow man salonsar ki i jooh.
Da ong u wa ka riti synchaar (Constitution) ka ri kdaw che ko wow khang u pynyaphær, kamtæ burom u wei ym em iwon iwon i pyrchah ya ki soo kur tangwa da pyrchah u ya i leh u Waheh Chnong wa katni, u Leo Laloo wa u Esterius Shylla kiwa da leh khlem i rai ka dorbar.
U Langi da ong u wa i thmu wow pynyaphær ya ki jait kur hapoh chnong ya kiwa da kha/chong ha Ummulong (Place of Birth) wa kiwi ki jait kur man i pyrchah ya ka aiñ.
Da kdaw u ya ki yurim heiwa nyngkong da ong u wa ym jooh sñiaw wa ini i kaam da yaklam ha kawon kawon ka Dorbar Chnong, da ong u leh wa ym jooh em ki sabut ha i thoh (Document Proof) wa tipmit da ka aiñ wow pynsakhiat da ka aiñ yeiyi wa da kha/chong chnong nyngkong ha Ummulong na kawon ka jait kur ha uyi u snem.
Da kylli u neiyi i daw wa da kha nyngkong du ya ki kur wa da niaw kyntang, cheiwon ki kur ki jait kiwa jooh man waheh chnong wa dkhot chnong na warim chwa kitai ki kur deiwa e nongmuna ya u Moo Pde, Chaimon Passah, Oli Syngkon, Kin Wareh, Khasi Langi, Don Phawa, Lieh Pariat, Bar Kynjin, Bet Shangpung (Lamare), El Shullai, Sylvester Shangpung, David Pala (waroh kiwa da khlaad) wa kiwi kiwi.
Hajrong i wai ya u Mot Sahnaam ki Soo Kur ha yung dorbar haka 31 Kmaichonglad, da ong u Langi iwa man wa da phah chna sop sop da u Leo Laloo wa u Esterius Shylla khlem iwon iwon i rai dorbar namo i mynjur ka chnong.
Heijooh i por da ong u wa ya ka yung ka Dorbar Chnong Ummulong da chna da waroh ki jait kur nadooh kiwa khroo tam hadooh kiwa poh tam, tangwa i booh ya u Mot du ya ki Soo Kur (Laloo, Shylla, Kyndiah & War) ha Yung Dorbar toh i hok kynti ki jait kur waroh wei man pyrchah ko yei mynjur ka chnong ka thaw.
Da dawa u leh wa u Leo Laloo toh u khut smat u ya ka dordar ryngkat ki jubab kiwa biang, lym kamtæ ka aiñ daw klam joor ko.
Da pynkut u leh wa kam u waheh chnong warim, wei kam uwa ebuit ya ka Synjuk Waheh Chnong Ri Jaiñtia, wow e yumut ya ka Synjuk wow thoh cha u Dolloi wa JHADC, wa kam ini u man i ka nongmuna ya kiwi ki chnong.
Also Read: Pynsah naam ka Ummulong yaki Soo Kur wa wan seiñ yaka chnong
