Kamwa ha waroh ki District Headquarter ka jylla kiwa sikai hapoh ka lama yong ka Meghalaya Upper Primary School Teachers Association (MUPSTA) da pynman yakhih ki ynne ka sngi deiwa chnong kyllaiñ myngngor neidaw wa ka sorkar wym pu em pynmankaam ko yei dawa wa sahteiñ yong ki itæ wow pynku kyrdan Deficit ya waroh 844 tylli ki skur Adhoc haka jylla, kamtæ da sakhi wa ha Jowai leh kawa man ka District Headquarter yong ka West Jaiñtia Hills, kiwa sikai MUPSTA leh da pynman ki yei yakhih.
Ha Jowai da pynman yei yakhih deiwa chong kyllaiñ myngngor ha madan Daimasi Ladthadlaboh wada chimbynta da kiwa sikai naki 35 tylli ki skur.
Hawa yaklam wa u E.G. War, Organising Cum Publicity Central Body, da ong u wa kani ka yakhih toh i pteiñ yeiwa da leh ini wa dep wow booddien yei dawa pynku kyrdan Deficit ya waroh ki skur Adhoc haka jylla iwa dang sahteiñ hadooh katni.
Ong haroh u wa kani ka yakhih da sdang ko nadooh u snem 1993, wei hapyrdi i yakhih wa nadooh kitai ki snem la san sien ka sorkar da pyrchang ko tangwa da leh du deiwa pynku tulop (Enhancement) kawa 10%, 30% ter ter wei khaddooh haka 1 tarik Naikhynde 2016 da pynku ko 100%. Itæ naka 8000 chaka 16,000 yaki Asst. Teacher; 9,000 cha ka 18,000 yaki Head Teacher.
Neitæ hapyrdi i lai luti yong ki ha u Kmaichonglad (Dec) 2018, u Montri Rangbah ka sorkar jylla u Conrad Sangma da kular u wow pynku kyrdan Deficit ya waroh ki skur, wei ha u Naisan 2019 ka sorkar da phah ko dei thoh cha waroh ki skur deiwa paan yukheiñ yudiah wei ki skur leh da phah ki yei jubab.
Tangwa ha u snem 2021, u E.G. War khana u wa ka sorkar da mylliñ ko yei thoh wa da paan ko naki skur deiwa phah pathan ko dei yong ka i tyrwa yow e 100% i pynku tulop biang iwa mut naka 16,000 chaka 32,000 wei naka 18,000 chaka 36,000 tangwa ini leh ym pu em krehkaam ko.
Kamwa ka ktien imsngi (Moto) yong ki ong ko “Equal Pay for Equal Work” kamtæ sñiaw ki wa da chah lehbeiñ ki chawa palat, deiwa ong ki kreh ki katjooh i kaam wei em ki katjooh i kitkhlieh, wei katjooh i por wa pynlut neibynta ki khynnah skur, tang weileh won phær i su, deiwa e nongmuna ya ki skur sorkar.
Chooh chooh u E.G. War ong u wa daw chong pyrkhat biang ki lym leh ka sorkar iyi iyi neibynta ini, daw pynman ki yei yakhih wa rap joor.
