Shillong: Ynne ka sngi ki jaitbru Assamese kiwa em ha kani ka jylla Meghalaya da pynman ki yaka yakhih pyrchah ya ka Citizenship Amendment Act, 2019 deiwa chong kyllaiñ myngor ha Asom Khristi Kendra, Shillong wei ha kani ka sngi da dawa leh na ka ka sorkar pyrdi wow pynkrehkaam syndon ya ka Inner Line Permit (ILP) ha ka thaaiñ mihsngi waroh kawi.
Hawa klam ha kani ka sngi, ka Purobi Barua da ong ko wa i leh yong ka sorkar pyrdi toh wow phiah ya ki bru yong ka North East neibhah da e yaka ILP ya ka Arunachal Pradesh, Nagaland, Manipur, Nagaland wa Mizoram, katwa ka jylla Meghalaya, Tripura wa Assam won ym yoh ki.
Da ong wa neibynta wow yada ya ka thaaiñ mihsngi yong ka ri India na i wan yong ki bru wa na baar emkaam yaka ILP, deiwa pynrap wa ki tre chnong ha Assam katni da kylla khian paaid pyn hapoh ka ka jylla yong ki.
Ha i jooh i por da ong wa kani ka aiñ CAA kawa da pdiang da ka sorkar pyrdi hawa yatoh waka jylla Assam man ko pyrchah ya ka Assam Accord kawa da ya soi ha u snem 1985 heiwa da chim ya u snem 1971 kam u snem ah pyrtuid, tangwa katkam ka CAA 2019, kitu kiwa wan chwa u snem 2014 daw man ki kam ki nong India.
Neiliang u D. Dhyan da ong u wa kam ki bru ym pyrchah ya kawon kawon ka niam, tangwa ka pyrchah toh yei wan yong ki bru kiwa na baar yong ka ri cha kani ka thaaiñ ka ri India.
Kiwa da ya chimbynta toh ki manbei, ki waheh, ki dkhot yong ka KSU wa kiwi kiwi kiwa yahkhmat ka seiñbhalang kiwa em ha ka nongbah Shillong.
Discussion about this post