Shillong: Ki wakreh yong ka North East Indira Gandhi Regional Institute of Health and Medical Sciences (NEIGRIHMS), wa kynthup yaka Trained Nurses’ Association of India deilang waka NEIGRIHMS Nurses Association ynne ka sngi da pynsñiaw ki yei pyrchah yei leh yong ki bor pynlai katai ka Hospital deiwa pynbaad wa katai ka Hospital ym chimkhia ko ya ki wakreh wow yada na i chah ktah na u khñiang COVID-19, tangwa da phah wow leh Quarantine ha yung hi yaki Nurse kiwa em Duty hapoh Covid Ward.
Katkam wa pyntip kini ki wakreh, em 9 ngut ki Nurse kiwa kreh hapoh ka Ward wa em kiwa yoh COVID-19 wa kiwi won kiwa yarap, wei ka yakhih yong ki toh wow dawa thaw wa kyrpang wow leh Quarantine neibynta kitu ki wakreh hapoh Covid Ward, neibhah hanla sap da ki PPE, tangwa ym ye wow pynsakhiat won hadooh katwon ki PPE ye ki wow yada.
Da ong ki leh wa i leh yong ki bor pynlai ye ko wow wanrah yei maa ya kiwa hayung hasem, wei ki da dawa ki wa ki bor pynlai wow e da i thoh paidbah wa ka NEIGHRIMS u chim ko i kitkhlieh lada jia næ chah ktah kiwa hayung næ ki marjan yong ki Nurse ki wakreh hapoh Covid Ward.
Hajrong i yakhih yong ki Nurse ha North East Indira Gandhi Regional Institute of Health and Medical Sciences (NEIGRIHMS), u Dr. Aman War da ong u wa katai ka Hospital em ko u yong ka hi u Director wei ki kyndon wa bood ki leh man ko katkam wa phah daka sorkar India. Tangwa da ong u wa hawa sumaar ki ya kiwa chah ktah ha u COVID-19, ki bor pynlai ka NEIGRIHMS da tip ki kammon wow e yada næ ki PPE.
Da ong u wa lada kreh haki Ward wa em kiwa yoh COVID-19, wow ong noh wa ki ye ki wow man kiwa rah ya utai u khñiang ym ye u man neibhah wa ya i yada wei ha i por wa mih ki naki Ward leh da looid ki yaki PPE kamwa da phah yaki wow leh khnang wow lait na i maa.
Hajrong i emkaam ya ki wakreh wow leh yaka Quarantine, u Dr. War da ong u wa hap wow sñiawthooh hi kitu ki wakreh hapoh ka Hospital.
Neiliang u Prestone da ong u waka NEIGHRIMS toh ka Hospital wa heh yong ka sorkar India wei i wym e yada ya ki wakreh toh iwa ym ye wow man, deiwa pynrap leh wa boi ye u man du nei tieñ yong ki wakreh, tangwa lada em iwon iwon i bakla neiliang katai ka Hospital, ka sorkar jylla daw chim ko ya i kamram katkam ki kyndon wa da booh da ka Ministry of Health and Family Welfare ka sorkar India.
