Jowai: I dawa ILP yong ki seiñbhalang wapher wapher haka jylla hapoh ka chatri yong ka CoMSO dang pteiñ i lyngba i yakhih wada pynman ha kylleiñ ki District ka jylla, wei ynne ka sngi ha Ri-loom Jaiñtia leh da sakhi yei mih ki seiñbhalang wow dawa pynyoh ILP yaka jylla Meghalaya.
Em na pyrdi ki seiñbhalang kiwa da rah yaki lama yong, ki Banner wada thoh yei dawa, wei da yieñ ki haki bynta waphær ka Jowai, nalor wa wah haroh yaki Banner haki bynta ka Iawmusiang, ka Gate i yungkrehkaam u DC deiwa beiñ joor yaka sorkar bei hajrong i wanrah yaka CAA hapoh ka ri.
Tangwa yaki Banner wa da booh haki thaw waphær da wan looid noh daki bor pulit du hadien kattu katni por.
Da sakhi wa neiliang ki dkhot ka seiñ JSM wa HYC deilang i rah yaki Banner da kbai dawa ILP ki ha laad Kiang Nangbah Govt. College.
Katwa ka seiñ HANM won da pynsñiaw ko yei dawa ILP deiwa kbai hawa lai luti lyngba ka Iawmusiang, nakhmat ka yungkrehkaam u DC, na Mynthong, na Pohskur neitæ won da wan mih biang ki lyngba ka Iawmusiang wei pynkut haka Newhill Petrol Pump.
Hei yaklam wa u W. Sohtun Assistant General Secretary Central Body HANM, da khana u wa ya oo da phah daka Central Body wow lum yaki dkhot ka HANM hapoh Ri-loom Jaiñtia yow pynyoo cha ka sorkar India wa katwon ka ILP man ko kawa emkaam tam haka jylla Meghalaya, wei yow ap u sñiaw ko yei ood i naam ki paidbah ka jylla Meghalaya.
Chooh chooh ong u, kani man kawa emkaam tam ya i khnang yow ye u yada ya idæ, neibhah kam ka jaitbru wa du chi troh lym yoh ILP ym em de ki laad u yada.
Da pynrap haroh wa ym kwah ki wow chah niom næ chah tlep ka jaitbru kamwa man ha kiwi won ki khian paaid cha kiwi ki jylla.
Da emlang ha kani ka sngi nadooh u Comming Dkhar, Vice President ka East Jaiñtia Hills District, wei na Jowai da lai won ki cha Khliehriat yow pynsñiaw ya kani hi ka jooh ka sur.
