Ka Mahatma Gandhi University (MGU), ka thaw puræ ki bru samen wa em ha Byrnihat, Ri-Bhoi ynnin ka sngi da chah kynroi ko ha kiwa lai puræ ha ka hadien wa pynsyad dor ware ki ya ka bai Provisional, ka bai Migration, ka bai Degree Certificate deilang waka bai Mark Sheet kiwa da poi waroh T. 28,000.
Kiwa lai puræ deilang waka KSU Mahatma Gandhi University Unit da lai pynman yakhih ki ha kani ka thaw puræ yow dawa pynduna noh ya kani ka bai ki kot ki sla wa da kheiñ hei dor syad kawa ym yahaap de wei kiwa boon da chem chitom ki wow su.
Kiwa lai puræ da ong ki leh wa ki wan ki na ki manyung wa dooh wa duk wei da chem chitom ki wow su ya kani ka poisa.
Hadien ini i yakhih, kiwa pynlai ya kani ka thaw puræ da chim ki ya ka rai wow pynhiar dor noh cha T. 8000 naka T. 28,000 wei da e por hadooh ka 30 tarik u Naichiphaw uni u snem wow su ya kani ka poisa.
Ha kani ka yakhih da wan leh ki pulit wow pyn jai-jai wei wow pynyasuk hadien wa da mih ka ya nia kawa joor bha hapyrdi ki khynnah wa kiwa pynlai ya kani ka thaw puræ kiwa da khang tala leh ya kani ka thaw.
Kiwa lai puræ da ong ki wa ynnin u snem kani da man ko T. 8500 donhi katwa ha uni u snem da pynku chadooh T. 28,000 heiwa da paan ki yei pynche neiyi i daw wa da leh yeini.
