Ki paidbah ha Garo Hills ynne i janmiet da kawang ki da ki moo, ki dieñ, ki chuki Plastic hakhmat ka yung krehkaam u Montri Rangbah namo ka Chief Minister’s Office wa em ha Tura heiwa da em 5 ngut ki pulit kiwa da mynsoo.
Ynne ka sngi, u Montri Rangbah, u Conrad Sangma da lai u cha Tura yow yachem ya ka seiñ ACHIK waka GHSMC kiwa da pynman yei yakhih deiwa chah thngan khlem da booh por yow dawa na ka sorkar wow pynkrehkaam ya ka Reservation Roster deiwa kheiñ nadooh nachwa wei wow pynman ya ka Tura kam ka Winter Capital ka jylla Meghalaya.
Da pyntip wa ini i jia da sdang i hadien wa da kut ka yalang, wei ye u man hadien wym hun iwa mih na kani ka yalang wa da pynman hapyrdi ka sorkar wa kini ki seiñ.
Kani ka yaklam da man ko kawa jai jai wei da neh ko palat 3 kynta heiwa u Montri Rangbah da khut u ya kini ki seiñ wa pynman yakhih wow wan ki cha Shillong haka 8 lane 9 tarik u Naisaphra yow yaklam.
Tangwa ha ini i por da wan da ki hajar ngut ki paidbah ki wym tip de kiwa neiwon kiwa da yang hakhmat ka yung krehkam u Montri Rangbah kiwa da sdang wow kawang moo kawang dieñ.
Ki pulit dei wym yohsa da siat ki da ki Tear Gas yow tympra ya kini ki paidbah wei ha ini wa jia da mynsoo 5 ngut ki pulit wei da piah leh ki yit kani ka yung krehkaam.
Da emlang leh u Montri ka chnat PHE deilang wa u Montri Rangbah kiwa dang sahkut hapoh kani ka yung hadooh wa pynmih ya ka khubor.
Discussion about this post