Ka ECC ka Elaka Sutnga da yaleh mukotduma ko pyrchah yei em ki karkhana Coke hapoh ka Elaka heiwa ya kani ka mukotduma da yaleh ha ka National Green Tribunal kawa da booh ha ka 25-10-21 wei da chong bichaar nyngkong ya ka ha ka 9 tarik uni u bnai heiwa yaka mukotduma da leh pyrchah ya ka sorkar Meghalaya, ka Meghalaya State Pollution Control Board (MSPCB), u Deputy Commissioner, ka State Environment Impact Assessment Authority (SEIAA), waka Ministry of Environment Forest and Climate Change (MoEF&CC).
Ha ini i chong bichaar nyngkong, ka NGT da e por ko soo tayaw ya kiwa chah leh mukotduma wow jubab ki.
Ha ka hukum wa da pynmih ha ka 9 tarik da ong wa kiwa yaleh mukotduma da ong ki wa da chah ktah bha ka rymaw deiwa pynkrehkaam ya ki tyndur kini ki karkhana kiwa da pynkrehkaam pyrchah ya ki kyndon wow yada ya ka la-ær kamjooh ka um iwa da ktah yei chait i khiah kiwa chong chnong.
Da wanrah leh hakhmat ka yung bichaar yaka bui (Report) ka MSPCB kawa em tarik 15-01-20 yow pynsakhiat wa kini ki tyndur kini ki karkhana em ki 100-300 meter na ki chong wa sah ki bru. Da wanrah leh yei pynbna (Notification) wa pynmih da ka MSPCB ha ka 23-12-2020 heiyatoh wa ki karkhana Coke wa ye u pynmih hapoh 25,000 MTPA chi snem deiwa kdaw leh wa lada em boon tylli ki karkhana chi thaw namo ka Cluster toh u yajngai ki 1 Km kawi na kawi wei kawi ka Cluster toh u jngai ko ym duna 5 Km na kawi won ka Cluster. Ha ka Notification wa da pynmih ha ka 23-12-20 da booh kyndon wa ka karkhana Coke wa em samen toh u jngai ko 500 Meter na ki sarok wa 100 meter na ki wah, ki nan wa 1 kam na rood ka chnong kamjooh ki thaw paidbah kam ki Hospital, ki skur wa ki thaw uiñke suwari.
Kamtæ ka NGT da sñiaw ko wa ini i kaam toh iwa emkaam wow chong bichaar chooh chooh wei da booh ya ka 31-01-22 kam ka tarik wow chong bichaar biang.
Neiliang ka ECC da phah khubor ko cha ka sorkar wa ini toh du i sdang donhi wow lai da ka aiñ wei daw phah tuklar leh ha ka Income Tax Department neibhah katkam ki kot ki sla wa em ka ECC da em da ki spah klur ka poisa kawa ym em su kam ka dan da ki bru wa man kam ki tre jylla (Local Tribal) kiwa da yada ya ki baar jylla deiwa ong leh wa da em hadooh 41 tylli ki karkhana Coke hapoh ka East Jaiñtia Hills District wa mantre da ki baar jylla.
Ka ECC da ong ko leh wa da chem ko wa ym em biang i rukom sylli ka Single Window Agency chwa wow e bor wei da e thurmur hi-eh ya ki mynjur ka SWA da ka chnat Commerce & Industries.
Ka ECC da maham ko leh wym pyrkhat ko arsien hadooh wow rah yeini i kaam chadooh ka Supreme Court.
