Jowai: Ka North East Students’ Organisation (NESO) ynne ka sngi da e ko yaka mukotduma haka Supreme Court ka ri India pyrchah yaka Citizen (Amendment) Act, 2019 wa kani ka aiñ da tyngkheiñ ko ya ki Fundamental Rights kiwa em hapoh ki Article 14, 15, 19, 21, 25 wa 29 ka Constitution ka ri.
Da ong wa kani ka aiñ kawa thmu wow pynman tre ri ya kiwa chong chnong hapoh ka ri pyrchah yaka aiñ kiwa man Hindu, Sikh, Buddhist, Jain, Parsi wa Christian kiwa na Afghanistan, Bangladesh wa Pakistan man ko kawa leh thurmur wei kawa ym em yurim wei daw pynchitom ko ya kiwa khian paaid ka ri kiwa em ha North East India.
Da kdaw wa kani ka aiñ ym em pyrkhat ko yaka thaaiñ North East kawa da chah ktah bha yei psiah tooh kiwa na Bangladesh heiwa haka 14-07-14 u Minister of State, Home Affairs da wanrah u hapoh ka Parliament wa ki nong Bangladesh kiwa em pyrchah yaka aiñ hapoh India da em ki 1,20,53,950 hadooh ka 31-12-2001 wei na kini ki 1.20 klur, 50 lak ngut da em ki ha Assam, 30,000 ha Meghalaya, 800 ha Arunachal Pradesh, 59,500 ngut ha Nagaland wa 3,25,400 ngut ha Tripura.
Ki kyndon Section 2, 3, 5 wa 6 kani ka aiñ da tyngkheiñ ko ya i hok ki bru wa em ha North East India wow yada wei wow pynneh pynsah yaka dustur riti yong ki dei wym pyrkhat yei wan psiah ki bru pyrchah yaka aiñ iwa da pynkylla leh yei rukom boon bru hapoh kani ka thaaiñ.
Da e daw leh wa kani ka aiñ daw wanrah ko yei yukit wa ym yahap yaki jylla ka ri neidaw wa ym em leh booh yaka mang poisa ya kiwa yaleh yow man tre ri wa kiwi kiwi.
Discussion about this post