Yaleh mukotduma kiwa sikai SSA yow su ka sorkar yaka Arrear

Ka synjuk yong kiwa sikai SSA hapoh ka jylla, ka Meghalaya SSA School Association (MSSASA) da yaleh ko da ka mukotduma hapoh ka yungbichaar Meghalaya High Court heiyatoh wa i pynslem wow su yaka Arrear cha kiwa sikai SSA kawa hadooh phra bnai, katæ nadooh 1 tarik, Naiynniaw (July), 2016 hadooh ka 28 tarik, Thohlakhmi (Feb), 2017 yong u snem 2016-17.

Ya katai ka mukotduma ka MSSASA da e haka ha ka 28 tarik, Duiatra (Jan) 2020 pyrchah ya ka sorkar India wa ya ka sorkar Meghalaya katkam ka Article 226 yong ka riti synchaar ka ri India.

Ha ka mukotduma, ka MSSASA, da kdaw wa ya ka tulop yong kiwa sikai SSA ha ka jylla Meghalaya da mang wei pynku da ka yung krehaam yung u State Mission Director SEMAM-SSA & Commissioner & Secretary ka chnat puræ puthi ka sorkar Meghalaya lyngba i pynbna wa mih haka 31 tarik, Naichiphaw, 2016.

Ka MSSASA da kdaw ko leh wa ha kani ka mukotduma wa ka sorkar jylla ym em pyllait ko ya ka Arrear cha kiwa sikai SSA kawa toh u su nadooh ka 1 tarik, Naitung, 2016 hadooh ka 28 tarik, Thohlakhmi, 2017 yong u snem 2016-17 wot hadien wa ka seiñ da e ko boon tylli ki thoh cha ki bor wa toh u pait yong ka chnat puræ puthi wa cha u montri ka chnat puræ puthi wei kamjooh leh wot cha u montri rangbah deiwa kyrpaad wow pyllait noh ya ka  Arrear yong kiwa sikai skur SSA.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh, ka seiñ da kdaw ko wa hadien i phah ya boon tylli i thoh wa i yachem wa ka sorkar na i por cha i por, da kut ko du ha i yaklam wei ka seiñ da phah ko leh da ka Legal Notice ya ka sorkar jylla ha ka 20 tarik, Thohlakhmi, 2019 wow  dawa wa toh u pyllait noh syndon yaka Arrear yong u snem 2016-17 heiwa neiliang yong ka chnat puræ puthi leh da pdiang ko wa i dawa yong ka seiñ wow pyllait noh ya ka Arrear man ko kawa chong nia.

I wym pyllait ya ka  Arrear yong kiwa sikai SSA da ka sorkar jylla wot hadien 4 snem wa da pynku ya ka tulop, man ko i pyndooh ya ka hok kiwa sikai katkam wa da kdaw ha ka Article 14, 16, wa 21 yong ka riti synchaar ka ri India wa kiwi kiwi ki hok katkam ka aiñ.

Kam wow kdaw heini, kiwa sikai SSA hapoh ka jylla ha ki snem wa da dep da pynman ki boontylli ki program yakhih wow dawa pyllait ya ka tulop Arrear na ka sorkar jylla.