Shillong: Ka seiñ Thma U Rangli-Juki (TUR) da yaleh ko da ka Public Interest Litigation (PIL) ha ka Supreme Court wow pyrchah ya ka aiñ CAA 2019 ha ka 13 tarik uni u bnai.
Ha kani ka PIL, ka seiñ da kdaw ya ki 17 tylli ki phang kiwa man pyrchah ya ka riti synchaar yong ka ri.
Uwa yahkhmat ka TUR u Pastor Kyrsoibor Pyrtuh da ong u wa da leh ya ini neidaw wa ka CAA man ko pyrchah ya ka riti synchaar ka ri kawa da pynmih da ka sorkar ya kawa da pynbna wow pynkrehkaam nadooh ka 10-01-2020.
Haka PIL ka TUR, da pynbaad wa ka CAA 2019 man ko pyrchah wei tyngkheiñ ya ki hok tynre wa da prooid dak ha ka riti synchaar, kam ka hok wow man mar ryngkat ha khmat ka aiñ ka Article 14, ka hok wow man laitlooid wow im laitlooid ka Article 21, ka hok wow ngait Blai wei wow mane Blai laitlooid ka Article 25 wa ka hok wow im jar jiar wa kyrpang du samen hi.
Ka TUR da kdaw ko leh wa ka CAA 2019 man ko leh pyrchah leh ya ka hok tynre yong ki Tribal kawa kynthup leh ya kitu kiwa chong wa sah ha ri Bangladesh, kam ki Khasi, Jaiñtia, Garo wa kiwi de kiwa boon kiwa im wa chong chnong ha Bangladesh.
Ka CAA 2019 ym em pyrkhat iyi iyi yeiwa sakhiat ya kiwa im kiwa em ha ki thaaiñ khapppood hapyrdi ka Meghalaya wa Bangladesh wa ha ki jylla ka thaaiñ mihsngi kiwa em ha khap wa ki ri kam ka Bangladesh, Mayanmar, China, Bhutan. I yong sakhiat wa kammon ki kur ki kha ki paradoh para snam ya im ki, ya kreh ya khih ki wa yaka imlang sahlang ha waroh arliang yong u pood u ang.
Da ong leh wa ka CAA 2019 ym pyrkhat ko iyi iyi leh ya kiwa im ha ki thaaiñ khappood wa ka Bangladesh. Ki Khasi (niam tynrai)i, ki Pnar (niamtre) wa ki Garo (songsarek) kiwa boon kiwa im wa chong chnong ha Bangladesh kiwa dang ksoh wei mane Blai katkam ka niam tynre wei ym em yatoh ki iyi leh wa kiwi ki 6 tylli ki niam kiwa da kdaw ha ka CAA 2019. Kamtæ ka aiñ CAA 2019 da leh chilliang wei da kyntait beiñ ya ki para kur para kha kiwa em ha ka niamtre.
Discussion about this post