Ynne ka sngi ka yung kasari Meghalaya High Court da pdiang ko ya kawi ka mukotduma PIL wa da ujor da uwi u muktiar na Dkhiah West, East Jaiñtia Hills, u Kerlang Ksoo heiyatoh wa i wym chna pynmiat ka sorkar ya u sarokbah NH-6 uwa man leh kam chibynta u sarok Shillong cha Jowai-Khliehriat.
Ha ka mukotduma u Kerlang da ong u wa i sih uni u sarok da man i chawa palat heiwa da em boon tylli ki thlu iwa pynthut yei lai i wan ki bru kamjooh leh da wanrah i ya i tyrrah kari ha uni u sarok wei u sarok uwa miat toh i hok ki bru katkam ka Article 21 yong ka riti synchaar ka ri.
Chooh chooh da ong u wa i sih u sarokbah khamtam ha Ri-loom Jaiñtia ha u NH-6 Jowai-Khliehriat da mih boon ki thlu wei ini da pynthut bha i yei lai i wan ki bru kiwa pynemkaam ya uni u sarok man ka sngi.
Hajrong kani ka mukotduma ki ar ngut kiwa bichaar kiwa kynthup ya u Chief Justice, u Sanjib Banerjee wa u Judge W. Diengdoh hawa bichaar ya kani ka mukotduma da ong ki wa toh i kaamram ka sorkar (jylla) wow pynneh pynmiat ya ki sarok heiwa da kyrmen wa u sdang chna pynmiat noh ya uni u sarok khnang wow lait u sepai i phñiang wei wow lait nei pynjoor i mih tdem ki kari.
Ya kani ka jooh ka mukotduma daw chong bichaar biang ha ka 15 Kmaichonglad Dec), 2021.
