Ka Meghalaya Energy Corporation Limited (MeECL) da yoh Notice biang ko yow phah su ya ka bai bordiñ kawa T. 23.06 klur wei lada ym ye u su daw chah pynduna bordiñ biang ko nadooh pyrdi synyaw ka 31-08-21.
Kani ka Notice toh kawa da phah da u Chief General Manager neibynta ka Central Transmission Utility of India Limited ha ka 19 tarik uni u bnai cha ka Chairman Cum Managing Director ka MeECL.
Ka Notice da ong ko wa ka MeECL kawa pynemkaam bordiñ kawa tip kam ka Inter-State Transmission System Customer deiwa yoh yoh bordiñ lyngba ka Inter-State Transmission System (ISTS) na kiwa kiwa boon ki thaw pynmih bordiñ wa em hapoh ka ri, da em ko ya i kitkhlieh wow su ya ka bai bordiñ heipor wa biang wei toh u e ko ya ka Letter of Credit yow su katkam ka aiñ Electricity Act 2003 wa ki kyndon ka CERC.
Da kdaw wa ka MeECL dei wym su ko ya ka bai bordiñ wot hadien wa da booddien ka Central Transmission Utility (CTU) man-i-por da poi ka bai bordiñ cha ka T. 31.67 klur hadooh katni heiwa na kani kawa toh u su toh neibynta ka 45 sngi kawa da poi T. 23.06 klur katkam ka bai bordiñ wa da dep pynmih da ka CTU.
Kamtæ da ong wa katkam ki kyndon Regulation 4 ka CERC (Regulation of Power Supply), 2010 lada em iwa sah dei wym em su ya ka bai bordiñ, ye u phah ya ka Notice wow pynduna noh yei rukom pynpoi bordiñ cha kitu ki wym su.
Da e por leh ya ka MeECL wow su ya ka bai bordiñ ki 45 sngi ha lane chwa ka 26-08-21 wei lym kamtæ daw e bordiñ 50 MW donhi cha ka MeECL nadooh pyrdi synyaw ka 31-08-21.
Nyngkong daw pynduna bordiñ chwa chi bnai hadooh wa su ya ka bai bordiñ yong ki 45 sngi wei daw pynduna ya ka bordiñ wa e naka NEEPCO, NHPC waka NTPC kiwa man ki thaw wa chim bordiñ ka MeECL.
Da phah leh ya ka NERLDC wow pynkhreh ko wow pynduna yei e bordiñ manda pyntip cha ka ha ka 27 tarik uni u bnai lada ym su ya ka bai bordiñ ha ka 26 tarik kamwa da kdaw.
