U President ka Seiñ Khooid Ya Ka Wah Myntdu, u Khroo Lamsalanki Pariat dei sñiawkhia hadien wym ye de ka Jowai Municipal Board wow yoh ya ka thaw noh jhep wa kyrpang neibynta ka chnong Jowai, ki dkhot ka seiñ da pynman ki yei booddien wow lai pait ya ka thaw wa thmu ka JMB wow noh jhep hei thaw yong ka JHADC kawa haap ha ka chnong Khliehtyrchi iwa tip kam i Pangit.
Ha i boodien u Khroo L Pariat deilang wa ki dkhot ka seiñ KYWM da chem wa da yang chwa yei maa ya ka wah Myntdu wa ki pynthor kba ka chnong Demthriñ na ka Liang Mynkrem Khliehtyrchi, lada ka JMB u yoh ko u noh jhep ha Pangit neibhah manda joor u slap ha kani ka lyiur wow wan, i kjut wa boon jait na ka la-ær bih daw wan deilang wa i smatung manda chit bha ka sngi.
Sa iwi iwa chem wa dang yoo maa choh chooh toh i noh khiar wa da suba wa da noh da kiwa boon tylli ki truck yei jhep khamtam ha ki bynta yong ki riat, ki thaw wa em ha u sarok wow lai cha Thomas Jones Synod College na Dulong College Road kiwa da haap cha ki wah dooid kiwa daw poi cha ki bynta ka Myntwa, cha wah Myntdu ha Pynthorwah.
U Khroo Lamsalanki Pariat da pynsñiaw u yei sñiawsih yei tlot krehkaam ka Jowai Municipal Board wa ki bor sorkar wa pait wa pynlai ya ka West Jaiñtia Hills District heiyatoh wa i jhep. Kamtæ da kyrpaad u ya ki bor ka sorkar jylla wa pait ya ka West Jaiñtia Hills District wa East Jaiñtia District wow pynkrehkaam smat ya ka aiñ Solid Waste Management Rule 2016 wa da chna da ka sorkar India kawa haap hapoh ka Environment (Protection) Act 1986 kamwa da dep prooid dak neibynta wow pynneh pynbha ya ki wah dooid, ki tyllong um wa ya ka wah Myntdu wa ki Pynthor Kba.
