Ka KSU West Jaiñtia Hills District Unit da beiñ joor ko ya ka sorkar MDA-II hajrong i ieh lyngkrang ya u sarok Jowai Bypass uwa da sih cha palatpood iwa da booh hei eh ya ki paidbah wa lai wa wan ha uni u sarok.
Ynne ka sngi ka seiñ neiliang u General Secretary ka seiñ u Leningrad Tariang wa u Finance Secretary, u Phrangki Papang wa ki kattu katni ki dkhot da lai pait ki ya uni u sarok wei da chem hadooh katwon yoo maa neibhah na uni u sarok da lai da kiwa boon ki kari wa heh kiwa da yoo lakam wow kylla wei wow ban ki ya kiwi ki kari khian neidaw wa joor boon ki thlu wa heh.
Da ong leh wa i joor sih uni u sarok da pynbor ko ya kiwi ki kari khian wow lai ki na Jowai hawa lai Shillong kamjooh hawa liwan iwa da pynkhynnia ya ka chnong Jowai.
Ka seiñ da beiñ ko leh yeini wym bien ka sorkar wow chimkhia u chna ya uni u sarok uwa da man u budloom ka khayi pateiñ ha Ri-loom Jaiñtia uwa da chah ieh bieñ wei ka sorkar iwa da yoo lakam wa yang ko hadooh wa jia iwa sñiawsih yow pynchna ya uni u sarok.
Ka seiñ da kular ko leh wow booddien ya ini i kaam wei wow thoh cha ki bor wa toh u pait ya uni u sarok.
