Ka seiñ kiwa chet ja sngi haki skur wa tip kam ka All Jaiñtia Mid Day Meal Workers Union, Jowai hei yahkhmat u K.L. Pariat kam u Adviser, u Jerry Anderson Suting kam u President ynne ka sngi da pynsñiaw ki wa neiliang ka seiñ kamwa man kattæ dang yang ko yei jubab naka sorkar bei heiyatoh i dawa pynku yei su e sñiawbha (Honorarium) neiwa jooh e ko du T. 900 chi bnai neibhah man iwa ktah hadooh katte katte ya ki.
Hajrong ini i dawa yong ki naka sorkar bei khana ki wa u Lat ka Meghalaya dadep phah u yei thoh cha u Prime Minister ka ri nadooh ka 3 tarik u Naiynru 2022, neitæ ka seiñ da phah won ko ka chithi pynkynmoo cha u Prime Minister lyngba u Secretary yong oo deiwa yooluti wa ha kini ki sngi u yoh noh ki yei jubab khang wa kam kiwa chet ja sngi ha ki skur u lait ki nei kulmar i sorsa.
Heiyatoh won waka bhah wa jooh su da ka sorkar jylla kawa T. 100, u K.L. Pariat ong u wa hadien i yakhih wa pynman ki ha Shillong haka 29 tarik u Naisaphra, neiliang ka sorkar Meghalaya lyngba ka chnat Education da tyrwa ko wow pynku noh ka bhah yong ka naka T. 100 cha ka T. 2000.
Kam wow pynkynmoo waroh chi kattu kiwa chet ja sngi haki skur yoh ki yei su wa du T. 1000 chi bnai, iwa mut T. 900 ka bhah naka sorkar bei, T. 100 won naka sorkar jylla.
I daw wa khian ware i su wei wym yahaap de wa ki kaam wa hap ki u kreh, da pynman ya ki wow mih madan ki neipor cheipor yow dawa pynku nong naka sorkar jylla kamjooh ka sorkar bei.
Najrong wa dawa ki u pynku yei su, dawa ki leh wow su noh waroh 12 tylli ki bnai haka chi snem, neibhah wa ki leh em hok ki u yoh i su wa 12 bnai kamwa yoh kiwa sikai wa waroh kiwa kreh sorkar yow rap toh rap biang ki.
U K.L. Pariat kyntu haroh u ya waroh 60 ngut ki MLA kiwa jooh lai cha ki paidbah heipor Election deiwa ong wow pait ki ya kiwa dooh, kiwa kup sem chilliang, kamtæ haka Assembly ka wow man ha kini ki sngi leh ong u toh u yaklam ki heiyatoh u pynku i su cha kiwa chet ja sngi haki skur, lym kamtæ ym em yumut ka PM Poshan ha Meghalaya wot hawa boon na kiwa chet ja sngi toh ki manbei.
Heijooh i por ong u lada ka sorkar jylla ye ko u pynlut haki tamasa, u pynmiat pynbha yaki District waphær ka jylla ye hi ki u su T. 2000 cha kiwa chet ja sngi.
