Shillong: Ki dkhot yong ka Hynniewtrep Youth Council, Shillong City hapoh i yahkhmat u Joy Phankon uwa man u Organising Secretary ka HYC Nongthymmai Circle, ynne ka sngi da lai ki wow khynra ya kawi ka yung wa dang chna ha Nongrimmaw, neibhah wa da yoh yutip wa em ki wakreh kiwa na baar jylla.
Katkam wa pyntip u Phankon, ka seiñ da lai ko wow khynra ya katai ka thaw hadien wa da yoh yaka ujor na kiwa chong chnong wa em ki baar jylla kiwa dang dep wan na Assam ki wakreh ha katai ka thaw wei da mih ki leh cha ki thaw paidbah iwa da wanrah yei maa ya kiwa chong chnong na ka khlam COVID-19.
Ha ini i khynra da emlang ki dkhot ka HYC Shillong City wei da chem wa kini ki baar jylla ym em ki yaki kot ki sla kiwa biang nadooh ki NRC, Labour Licence lane wa da leh ki namo ym em yaka Quarantine wei lada dep Test næ ym em ya u khñiang COVID-19.
Ha itai i por wa ka seiñ da pynman ko yei takit yaki baar jylla, da wan mih leh u tre yung uwa da pyrchang wow yada ya kitai kiwa kreh mylla, wei hadien i yania waki dkhot ka HYC, da wan tuklar noh da u Rangbah Shnong ka Nongrimmaw wa ki pulit yong ka Laitumkhrah Beat House.
U Joy Phankon da pynsñiaw u yei pylla ya ini i yoh psiah ki baar jylla, wei da beiñ joor u leh yaka dorbar chnong Nongrimmaw, neibhah wa ha kam ini i por wa dang joor ka khlam COVID-19 ha ka jylla, ka dorbar chnong Nongrimmaw da chah ko ya kini ki bar jylla wow wan wow kreh ha kani ka thaw iwa da pynchong sier ya kiwa chong chnong.
