Ynnin i janmiet heipor kamwa 4:00 waje kawi ka Speedboat ka Indian Navy da tyrrah ko ya kawi ka lieñ wa kit bru paidbah hajan Gateway of India ha Mumbai heiwa da yap 13 ngut ki bru.
Hapoh kani ka Speedboat da em ar ngut ki bru ka Navy wa soo ngut won ki bru wa pynchna ya ka Engine wa dang pyndait thymme heiwa uwi u bru ka Navy wa ar ngut won kiwa pait Engine da yap ki heini wa jia.
Kani ka Speedboat ka Navy toh kawa dang pyrchang ya ka Engine thymme heiwa da thut syndet ka kor ko wei da tyrrah ko ya ka lieñ wa pyrtuid Neel Kamal hajan Karanja, Mumbai.
Neiliang ka Indian Navy da ong ko wa da em i thut ka kor namo ka Engine Malfunction wei ymye de wow pynlai luti ya kani ka Speedboat.
Kani ka lieñ wa kit paidbah toh kawa lai na Gateway of India cha Elephanta Island kawa man ka thaw wa pawnaam ya kiwa uiñke suwari wei da kit ko kamwa 120 ngut ki bru heiwa 20 ngut toh ki khynnah. Na kini ki khynnah da em iwi i khonboo wa yap.
U bru wa yoh u riñ Video yeini wa jia da ong u wa da leh u yeini deiwa pyrkhat toh wa leh Stunt ki Navy wei manda chah tyrrah ka lieñ ki toh iwa joor bha hadooh wa ki bru da chah kyntiñ ki cha suiñ wei uwi na kiwa em hapoh kani ka Speedboat da hær chadooh chapoh kani ka lieñ.
Ki pulit ka Colaba Police Station da Register ki ya ka FIR katkam wa ujor u Natharam Chaudhary uwa na Sakinaka, Mumbai.
Mar ya jia ini i yatyrrah ki Navy chirup wa ka Coast Guard wa Marine Police da kreh ki wow pynlait ya ki bru heiwa da yoh wow pynlait ya kiwa boon.
Heiyatoh wa ini, u Prime Minister, Narendra Modi da pynbna yarap u Rs. 2 lak cha kiwa ha-yung yong kiwa yap wa Rs. 50,000 cha kiwa mynsoo katwa u Chief Minister ka Maharashtra da pynbna u Rs. 5 lak cha kiwa ha-yung kiwa yap.
Discussion about this post