Jowai : Hadien wa da oor ka Night-super ynnin i miet heipor 9:45 kawa wan na Silchar cha Guwahati cha synrang ha Sonapur da yoh ya ka yutip wa tikna heiwa da yap hadooh 29 ngut wei da mynsoo joor 9 ngut kiwa chong ha ka.
Ini da jia i hajan ka Sonapur Tunnel hajan ki mandir hei thaw wa synrang bha wei kani ka bus em ko ya u number AS 10 EC 7494 kawa da pyllai da ka Arhans Tours and Travels, kawa na Silchar, Assam.
Hadien wa jia ini da sdang ki paidbah, ki pulit, ki Homeguard wa ki chipai ka BSF u yaleh katwa ye u yarap ya kiwa mynsoo nadooh ynnin i miet kamwa 11:30 wei ini da pateiñ i yarap hadooh ynne i janmiet.
Ynnin i miet da ye u sai ya kamwa san ngut kiwa mynsoo heiwa ar ngut man ki kiwa yaplær katwa ynne won da ye u sai soo ngut heiwa le ngut na ki toh ki chipai CRPF.
Na kiwa 29 ngut kiwa da yap hadooh ynne i janmiet da ye u sai du 9 tylli ki metyap wei dang pyrchang leh u sai ya kiwa dang chah ban ha ki moo wa ka bus.
Heijooh i por da ong wa neidaw wa synrang ware i thaw da duk u pynhiar ya ki metyap cha ka wah Lukha heiwa da kit won ya ki da ka lieñ ki BSF cha chnong Kuliang, East Jaiñtia Hills wa em mar khappood wa ka ri Bangladesh.
Ha ini i hiar yarap da em bynta ki bru ka Homeguard ka jylla wei neidaw wa synrang ware i thaw da em i tlær i oor heiwa da mynsoo hadooh le ngut na ki.
Wow hiar cha kani ka thaw kiwa yarap da duk ki u pynemkaam da ki tylle yow hiar cheini.
Hei yoh u yaklam wa ki heh ka BSF da ong wa daw pteiñ biang mynstep u sai ya ki 20 tylli ki metyap wa dang sah wei ympu tip boi dang em chooh kiwa chah ban ha ka bus næ ha ki moo ki dieñ. p.
Ya kiwa mynsoo da kit bakbak cha thaw sumaar kam ha Khliehriat CHC, cha Civil Hospital Ialong wa cha NEIGRIGMS.
Discussion about this post