I pdung bomb ha ka skur niam Islam ynne i step kawa em ha Peshawar, Pakistan da pynmynsoo ko ya palat 80 ngut wei kiwa yap da em ym duna ya 7 ngut.
Ini i pdung bomb da jia i heipor kamwa 8:30 i step heiwa heipor wa dang e sikai ha kani ka skur niam wa tip kam ka Jamia Zubairia Madrassa heiwa da em kamwa 150 ngut ki bru hapoh i kamra wa e sikai.
Ya uni u bomb da suba ki pulit toh uwa da ieh ha kawi ka muna ha lait kani ka Madrassa uwa da antaad wa khia kamwa 5kg.
Ya kiwa mynsoo wa kiwa yap da kit cha Lady Reading Hospital.
Neiliang u Prime Minister ka Pakistan u Imran Khan da beiñ joor u ya ini wa jia deiwa kular wow e yei sumaar wa bha tam ya kiwa chah ktah.
Ym pu em wa kam kiwa emkti ha ini i kaam.
Ka chnong Peshawar toh kawa em hajan wa u pood ka Pakistan waka Afghanistan.
