Ynnin i miet da em i oor khyndaw ha i thaw sah kiwa kreh luti rel ka Tupul Railway Yard wa em ha Noney District ka jylla Manipur.
Ha ini i jia da yap 8 ngut ki bru wei da em leh kamwa 40 ngut kiwa wiar.
Neiliang u Montri Rangbah ka Manipur, u N. Biren Singh da lai pait u ya i kreh wow pynlait wei wow thooh ya kini ki bru wa chah ban dei yarap ki paidbah wa chong chnong, ki chipai (Army), SDRF, NDRF wa kiwi kiwi. Da pynbna u leh wow e T. 5 lak cha kiwa hayung yong kiwa yap wei T. 50,000 cha kiwa mynsoo.
U Montri Rangbahdooh ka ri, u Narendra Modi leh da yaklam u wa u Biren Singh wei da tyrwa u wow yarap katwa ye ya ka jylla.
