85 ngut ki bru da dooh ki yei mynsien ki hadien wa kawi ka lieñsuiñ da hiar ko ha ka Muan International Airport wa em ha South Korea wei da lai tyrrah ko ya iwi i kynroh heiwa da kop diñ ko iwa da jia ynne i step heipor 9:30 i por kani ka ri.
Kani ka lieñsuiñ kawa kit ya 175 ngut ki bru wa 6 ngut kiwa pynlai ya ka, da hap bait ko wow hiar hadien wa ki chaka ko ym mih ki wei da suba wa da sih ki hadien wa tyrrah ko ya kawi ka sim. Chwa ini da mut ko wow hiar tangwa u Pilot da skit biang u deiwi wei hadien wa mut u hiar biang sa chisien ym em de krehkaam ki chaka kiwa tip leh kam ki Landing Gear.
Kani ka lieñsuiñ toh ka Jeju Air Flight 7C2216 kawa man ka Boeing 737-800 Jet wei toh kawa wan na Bangkok, Thailand heiwa kiwa chong hapoh toh 173 ngut kiwa na South Korea wa ar ngut kiwa na Thailand.
I Video wa da poor da pynyoo wa kani ka lieñsuiñ ym ye de ko wow sangeh neidaw wym em mih ki chaka ko wei da hiar bait ko dei kpoh wei da lai tyrrah ko yei kynroh heiwa da kop diñ wot ko.
Ar ngut kiwa dang im kiwa da ye u sai na kani ka lieñsuiñ wa da kop diñ toh uwi uwa man kam u Flight Attendant wa uwi won uwa man kam u bru paidbah wei ya kiwa boon hi da antaad toh kiwa da khlaad lut hadien wa sai ya ki 85 ngut kiwa da dooh yei mynsien ki.
Discussion about this post