Ynne ka sngi da em 2 ngut ki bru paidbah kiwa khlaad wei da mynsoo kamwa 8 ngut hadien wa mih i awri hapyrdi ki paidbah wa ki bor ka Darrang District, Assam hadien wa chah beh ki na i thaw wa chong yong ki ha chnong Gorukhuti.
Ha ini i jia da em leh kamwa 8 ngut ki pulit ka Assam kiwa da mynsoo hadien wa ki paidbah da yakhih pyrchah ki ya ini i leh ka sorkar.
Katkam ka yutip wa da yoh da ong wa ki bor District da sdang ki wow khyndang wow sliah ya ki yung bru ha kani ka thaw tangwa ki paidbah da yieñ pyrchah ki wei heitæ da mih i awri heiwa da sdang i pakhot moo wa i awri hapyrdi ki ar liang iwa da pynbor ya ki pulit wow siat ki cha ki paidbah.
Katkam wa man kattæ ka sorkar Asssam ha kani ka 20 tarik uni u bnai da beh da khyndang ko ya ki 500 tylli ki manyung ya kiwa kam ko wa da chong ki ha ki thaw sorkar wei ynne won ki manyung wa chah ktah da em ki hadooh kamwa 800 tylli.
Kini ki ar thaw toh ki chnong kiwa chong wa sah da ki bru kiwa klam Bangla.
Ya ini i Eviction Drive da sdang ha ka 20 tarik ha ka thaaiñ Dholpur tangwa kiwa chong chnong ym em yaleh pyrchah ki ha katai ka sngi katwa ynne ka sngi da i mih i pyrchah wa joor bha.
