Ynne i janmiet heipor kamwa 4:45 da em i tyrrah kari wa joor hajan ka Ummulong Beat House, Ummulong, West Jaiñtia Hills heiwa da khlaad 2 ngur ki bru wei da mynsoo 4 ngut kiwi tawon kiwa dang em hapyrdi i chah sumaar kattæ.
Katkam ka yutip wa da yoh da ong wa heipor 4:45 i janmiet kawi ka truck wa em u Number NL 01AD 4625 kawa lai na i liang wa bakla (Wrong Side) wei kawa wan na liang Jowai kawa da yah pynhær bha (Full Speed) da tyrrah ko ya ar tylli ki kari kiwa kynthup ya ka Maruti Taxi kawa em u Number ML 04B 0242 wa ka Maruti Alto K10 kawa em u Number ML 05 L 4517.
Ha ini i chah tyrrah da khlaad ar ngut ki bru kiwa kynthup ya u Arlangki Bhoi (36 snem) ya uwa da pynkit cha Ummulong CHC heiwa da khlaad u chwa wow poi ha kani ka thaw sumaar wa ka Janailin Dkhar (30 snem) kawa da khlaad ha Dr. Norman Tunnel Hospital, Jowai.
Kiwa mynsoo ha ini i jia kynthup ki ya ka Expliomas Dkhar, ka Riward Pde, ka Rosalin Dkhar wa u Deilang Dkhar wei da pynkit ya ki cha Ummulong CHC.
Katkam ka yutip wa yoh da ong wa kiwa khlaad wa kiwa mynsoo toh kiwa chong hapoh ka kari kamai Taxi wei kini waroh toh kiwa na Chilliangraij, Jowai. Katwa kiwa chong hapoh ka Alto da mynsoo ki malu mala.
Uwa yah ya ka truck da yut noh u na ini i thaw wei neiliang ki pulit dang pynman ki ya i takit hajrong ini.
