Ka beipun u Raj Kushwaha da khlaad noh ko nei yoh Heart Attack ha yung ko ha chnong Rampur, Gazipur wa em ha Fatehpur District ka Uttar Pradesh ha ka 18 tarik uni u bnai.
Kiwa ha-yung ha-sem ko da pyntip ki wa neidaw wa joor khyrngiat ko na ini wa jia wei hadien wa cha kem u Raj heiyatoh wa i chah pynyap u Raja Raghuvanshi ha Meghalaya, da dam ko leh wow baam wei ym em de klam bru ko da boon sngi.
Kani ka beipun u Raj toh kawa tip kam ka Ram Lalli wei da em ko 74 snem i rta, wei neiliang u kirom ko, u Darbari Singh da pyntip u wa da joor bha sñiawsih ko nadooh wa mih i pyrtuid u Raj kam uwi na kiwa soohbuit yow pynyap ya u Raja.
Da ong u leh wa ka da yada bait ko ya u ksu ko deiwa ong wa em kiwi wa leh yow chah pynbaad cha oo wei ym ngait ko wa emkti u.
Heipor yaklam ka Ram Lalli wa kiwa thoh khubor da yada bait ko oo deiwa ong wa toh u khynroo wa em i kitkhlieh wei oo wa psa ya ka yung ka sem ki nadooh wa yap u pa u heipor ka khlam COVID-19.
U Raj toh uwa Pass Class-XII wei kreh u kam u Accountant ha ka karkhana chna Plywood kawa mantre da ka yung ka sem ka Sonam Rahuvanshi wa em ha Govind Nagar Kharcha, Indore wei ka leh kreh ko heini.
U Raj deilang ka bei wa ki ar ngut ki diah kynthai u toh kiwa sah ha Indore ha iwi i yung wa khian ha Shankar Nagar, Indore wei kattæ wot kiwa jan yung jan sem ki leh ym em de klam ki ya ki wei ka diah u Raj kawa em 15 snem i rta da yaplær ko kut wa sñiaw ko wa kieh Siren.
Ka bei u Raj, da pyntip ko wa hadien wa wan thang u ya u Raja da liwan yung u wei da yaam u hadooh chikynta tangwa hadien ini da kylliang sula u wei da lai u cha yung u Vishal uwa man kam uwi na kiwa emkti wow pynyap u ya u Raja wei da suki u kiaw hadooh ka Mobile Phone u leh da tympleh u ka.
Discussion about this post