Kiwa khlaad na u COVID-19 ha Meghalaya da poi ki 24 ngut hadien wa yap sa 4 ngut ha ki thaw sumaar wa em ha Shillong katkam wa pyntip u DHS (MI), u Dr. A. War.
Na ki 4 ngut kiwa dang yap na u COVID-19, uwi toh uwa tip kam u Sambha Shylla uwa na Wast Jaiñtia Hills uwa dang 21 snem uwa da rah cha NEIGRIHMS ha ka 10 tarik uni u bnai, uwa da dep chah sumaar leh ha Nazareth Hospital dep te rah cha Super Care wei da phah won cha NEIGRIHMS neidaw wa da pynyoo ya ki dak ki chin wei hadien wa Test da chem toh uwa yoh COVID-19 wei da khlaad noh u heipor 10:05 waje ynnin neidaw wa chitom u wow riñ mynsien deiwa yoh leh yaka COVID Pneumonia waka Meningitis.
Uwi won uwa yap toh u Khim Singh (46 snem) uwa na Happy Valley uwa da rah cha NEIGRIHMS ha ka 22 tarik u Naisaphra (Aug) neidaw wa iñdoh wei yoh u yei ka’oh kamjooh leh wa chitom u wow riñ mynsien wei hadien wa Test da chem wa yoh u ya uni u khñiang heiwa ya uni da booh hapoh ICU tangwa da khlaad noh u ha i por 10 waje i miet ka 10 tarik.
Sa uwi wa yap toh u Ram Nela Durga Prasad Rao (45 snem) uwa na Andhra Pradesh uwa da rah cha Civil Shillong ha ka 4 tarik uni u bnai wa iñdoh kamjooh wa chitom u wow riñ mynsien wei hadien wa Test da chem wa yoh u ya u COVID-19 wei da khlaad noh u haka 10 tarik heipor 10:40 i miet.
Kawa khadooh kawa yap toh ka Saraswati Puri (45 snem) kawa na Barapathar kawa da rah cha Nazareth ha ka 4 tarik uni u bnai kam kawa chitom COVID-19 wei da khlaad noh ko ynne i step ka 11 tarik heipor 4:30 wei da khlaad ko neidaw wa sangeh u klongsnam.
