Jowai: I jia wa sñiawsih nei ya baam tit wada jia nadooh ka 22, 23 tarik u bnai April haka chnong Lamin West Jaiñtia Hills District iwa da pynyoh kjut hadooh 18 ngut ki bru naki le tylli ki manyung, wei neini i yoh kjut da wanrah ko leh yei khlaad noh ki 4 ngut iwa da sdang nadooh ka sngi Sunday 26 tarik.
Haka sngi Sunday 26 tarik da khlaad u Morinson Dhar wa u Kadilia Khonglah, haka 29 tarik won da khlaad ka Synran Khonglah wa u Lapynshai Khonglah, kini waroh le ngut naka jait kur Khonglah toh kiwa dang chipayu tre.
Neitæ ynne ka sngi sa u payu arbei yong ki u Amstrong Khonglah da khlaad noh u hei por 12 waje i sngi ha NEIGRIHMS, iwa da wanrah yei ku kiwa khlaad neiwa baam tit chaka 5 ngut hadooh ynne ka sngi.
Kiwa dang em hapyrdi i chitom joor won kynthup ya u Dimah Gashnga u khon yong u Morinson Dhar uwa da khlaad haka 26 tarik, wa ar ngut kiwi won ka Mariaba Konglah wa ka Wanrika Konglah kiwa dang yatoh chipayu tre wa kitai ki le ngut wada khlaad chwa.
Hadooh kamwa man kattæ da em 5 ngut kiwa da khlaad nei baam tit, sa 3 ngut won dang em ki hapyrdi i chah sumaar ha Woodland wa ha NEIGRIHMS, katwa ki 10 ngut won da chait ki.
Discussion about this post