Jowai : Ka khubor wa da yoh na ka VDP ka Chnongpdeng kamjooh na ka Dawki Police Staion da pyntip wa ynne i step u wi wa bru na Guwahati u wa pyrtuit u Rituraj Phukan da yap ngam um u hadien wa haap u na ka lieñ wa chong ki ha ka wah Mynngot.
Ka Chnnongpdeng man ko ka thaw wa ka-it bha kiwa yuiñsawari katni wow lai ke pyngngad, da yoh khubor wa u Rituraj wa arngut ki lok u ka wi ka kynthai wa u wi u chynrang da poi ki cha ka chnong Chnongpdeng ynnin ka 18 tarik heipor kamwa 6 waje janmiet da kawi ka kari Ford Ikon.
Neiliang ka chnong da pdiang ko ya ki wei da e leh ya ki lifejacket næ ki sula wow sap ki kam wow yada nei ngam um chwa u li booh ya ki cha chiliang ka Wah Mynngot kamjooh leh da batai ya ki wa ym hoi u lai ki cha um khlem sap lifejacket hadooh chwa ka 10 waje i step ya ki wa uiñ sawari waroh da maham wa ym hoi u hiar ki cha ka wah wei wym hoi u chong ha ki lieñ wa kiñ da ki khynnah. Da pyntip leh wa kini ki le ngut da em ki ki yong ki hi ki tent.
Hei step yong ynne ka sngi 19 tarik heipor kamwa 5:30-6:00 waje i step kini ki le ngut da khut ki ya ka wi ka lieñ wa kiñ da u wi u khynnah ka wa emlang wa u lok u kiwa dang 12-13 snem i rta ki wa dang mut u lai li kit kwai na khloo.
Kini ki ki le ngut da phon ki ya kini ki khynnah da ka poisa yow kit ya ki cha neiñ ka wah na iwi i thaw wa sah ki. Kini ki khynnah da ong ki wa da khang ka chnong ya ki u kit ya kiwa uiñ sawari tangwa kini ki le ngut hadien wa poi kini ki khynnah rap ha rood ka wah da ksoh ki ya ka lieñ wei da kular u su poisa ya ki lada bien ki u kit lang wa ki.
Kamtæ kini ki khynnah da kit ki ya kini ki le ngut chadooh cha wa ye ki u kiñ wei da uiñ biang ki. Manda poi heiwi i thaw wa yllu bha wa da khut kam i Turoi u Rituraj Phukan da yieñ u ha ka lieñ heiwa da kyruiñ u cha u khynnah wa kiñ lieñ wei da paan u ya u boitha yow kiñ u da oo ya ka lieñ. Heini i por ka lieñ da sdang ko u khih wei da kylla ko hei wa u Rituraj da taan u ya u Boitha na kti u khynnah wa kiñ wei da ngam u deilang wa u Boitha.
Heini i por embhah wa em arngut ki kynthai wa dang wan kit kwai na khloo ha kawi ka lieñ kiwa yoo ya ini waroh da wan smat ki u yarap ya ki arngut na le ngut kini ki wa uiñ sawari katwa ya u Rituraj ym chem de ki ya oo.
Ya kini ki arngut da pyllait im deiwa ksoh ki ya ka lieñ ki wa yarap ya ki wei da yah ya ki charood um.
Yei met yap yong uni wa ngam da chem da ki wa tre chnong ki wa da ngam boon sien ha ini i thaw wa yillu ka um.
Ka metyap hei yaklam wa ki pulit ka Dawki Police Station da pyntip wa ya ka metiap yong uni u khynroo dang em ko ha Police Station neibhah ki wa ha yung u Rituraj da pan pynlait næ exemption ki yow leh postmortem ya oo.
Uni u wa yap toh u khon ka MLA ka jylla Assam ka Pranati Phukan.
Neiliang ka chnong Chhnongpdeng da kyrpad yo ya waroh ki wa wanke u bood ki ya ki kyndon (guidelines) wa da booh ka chnong yow lait u jai kam ini i wa sniawsih neini cha khmat.
Discussion about this post