Jowai : Heipor kamwa 9 waje ynne i step kiwa kreh mistiri ha iwi i dukan yong u ma Nick Lakiang wa em ha Pohkhyllem, Jowai da pyrchang ki u kyrsu thiah ya ki ar ngut kiwa thiah ha iwi i yung khyndawbilat wa em ha ini hi i thaw yow chim chabi ki na ki, tangwa ym em wa wai dwar ya ki napoh yung.
Hadien wa yoo ki ka wi ka khiandwar kawa ym em khang da wai ki ya ka wei da yoo ki ya ki ar ngut ki bru wa da thiah yap ha khyndaw hapoh kani ka yung.
Kini ki ar ngut wa kyrsu dwar da synrait ki da ka um nyngkong ha uwa em ha tre khiandwar tangwa ym em de khai u.
Kamtæ da pyntip ki cha ki pulit kiwa wan wai ya kani ka yung deiwa looid ya ka yit wei da taan ya u hook da u nar yow wai ya ka dwar.
Hapoh kani ka kamra da chem ya ki ar ngut kiwa yap, u Jantoni Dhar wa 42 snem wa u Deiplanmi Dhar wa dang 15 snem i rta. Kini ki ar ngut toh kiwa chi-ma chi-pyrsa kiwa na ka chnong Pammanik wei da kreh ki kattu la chisnem tam ha ini i thaw.
Hapoh kani ka kamra da em leh ar tylli ki battery Inverter wa ka wi ka Generator light. Ha uwi u tharu leh da chem ya ki ar tylli ki syiar wa yap.
Kini ki ar ngut wa khlaad toh kiwa yang miet ha ini i thaw wei ha kini ki ar tayaw da em du ki ar ngut donhi.
Ki tre dukan ong ki wa ya ka Generator da pynemkaam yow charge ya ki battery u Converter wei heipor wa pynemkaam ya ka da booh ha lait ini i thaw wa thiah kini ki ar ngut wei pynpsiah won ki ya ka cha poh hadien wa dep u charge ya ki battery.
Katkam i ong ki tre dukan wa ki ynnin heipor 10 waje i miet da mih ki na ini i thaw, da pyntip ki leh wa ha ini i thaw dang em bru wa chong hadooh 12 waje i miet wei neiliang ki wa li wan khaddooh da ong ki wa da wan khang wan tympleh ya ki light da uni u khynnah.
Da suba wa kini ki ar ngut wa khlaad da thap ki ya ka generator hapoh i kamra wa thiah wei u Jantoni da thiah chwa katwa u Deiplanmi da tympleh u ya ka Generator hadien wa liwan ki bru.
Ini i kamra toh iwa da khang sbak næ wei tang ya ki sky light ym em u wai ya ki. U Deiplanmi da khlaad u kamwa thiah u ha khyndaw hadien wa riñ mynsien tdem u yong ka generator katwa ya u Jantoni da chem ya oo ha khyndaw ha jan ka palong wa thiah u.
Ha ka miej wa em hajan palong u da chem ya u dieñ khein wa pynyieñ ha khlieh ka palong wa ka chuki ka wa pat. Da suba wa u Jantoni da khyrngiat u na iwa thiah u wei da pyrchang u wow wai dwar namo ya ki dwar khian yow psiah ka la-ær.
Neiliang kiwa ha yung yong kiwa yap hadien wa da hun ki wa ym em iyi i wa leh bakla yaki ar ngut da paan ki leh na ki pulit yow pyndam u leh Postmortem ya ki wa da khlaad.
Discussion about this post