Ynne ka sngi ka National Health Commission yong ka China da pyntikna ko wa kiwa yap neidaw u Coronavirus da ku i cha ka 304 ngut na ka 259 ngut ynnin.
Chooh chooh da ong ko wa kiwa chah ktah namo kiwa da bi kjut na uni u khñiang won da kynjoh i cha ka 14,400 ngut na ki 11,821 ngut ynnin ka sngi.
Ka ri Philippines leh da pyntikna ko wa da yap uwi u bru na uni u khñiang iwa man ka sien wa nyngkong wa yap u bru na uni u khñiang chabaar yong ka China.
Uni u bru uwa 44 snem i rta toh uwa wan na sorbah Wuhan kawa man ka sor wa sdang uni u khñiang ha China wei da khlaad u ynnin ka sngi deiwa yoh kjut Pneumonia wa joor bha. Hadien ini, ka sorkar Philippines da khang ko chipor ya ki bru wym toh ki Filipino kiwa wan na China, Hong Kong wa Macau wow psiah chapoh ka ri.
Uni u bru da poi u ha Philippines haka 21-01-20 deilang wa kawi ka kynthai kawa katni dang em ko hei pait ka chnat i chait i khiah.
Hadien wa uni u khñiang Coronavirus ya uwa da tip leh kam u 2019-nConVa poor khlem ye u pynsangeh neiliang ka World Health Organisation (WHO) da pynbna ko ya ka Global Health Emergency namo ka Public Health Emergency of International Concern (PHEIC).
Ha Hong Kong won, ki wakreh ha ki thaw sumaar kiwa em hadooh 9000 ngut da maham ki wow dam u kreh lada ym khang ya u pood wa ka China yow lait kiwa na China u psiah.
Discussion about this post