Uwi na ki chipai ka 16 Assam Rifles da yap u katwa uwi da mynsoo u hadien wa pdung u Bomb IED hajan Lilong Usoipokpi Makha Sangomsang wa dang haap hapoh ka Lilong Police Station ka Thoubal District, Manipur ynne heipor kamwa 1:35 i sngi.
Uwa khlaad toh u Longdon Wanshu (30 snem) uwa man kam u Rifleman uwa na Arunachal Pradesh katwa uwa mynsoo toh uwa tip kam u Pinku Dash (25 snem) uwa na Tripura.
Ha ini i thaw wa jia, da em hajan soo ngut ki chipai ka Assam Rifles heipor wa pdung. Heiwa u Wangshu toh uwa yieñ ha Veranda ka Sangomsang LP Madrassa wa jngai 10 phut na i thaw wa pdung katwa u Pinku da em u rap hajan.
Kiwi won ki ar ngut kiwa em hajan ym em mynsoo ki.
Ki pulit da suba ki wa uni u bomb da booh deiwa mang ya ki chipai ka 16 Assam Rifles kiwa da jooh sangeh wow chong ngiah ha ini i thaw.
Uni u bomb toh uwa da booh hajan kawi ka Top um wa jngai kamwa 15 Meter naka National Highway 102, u sarok Imphal-Moreh.
Hadooh wa pynmih ya ka khubor ym pu tip yi wa emkti ha ini i kaam.
