Ka seiñ All Hynñiewtrep People United Front (AHPUF) kam i dak wow yarap kylliang chaan kylliang, da e sñiawbha ko kamwa 8 jur ki thaw chong wa ki miej wa kawi ka almari kam i dak wow yarap ya ka Jaiñtia Career Coaching Center kawa pynlai daka Jaiñtia Educational and Social Welfare Organization (JESWO) kawa em ha Moowamon Mihmyntdu.
Ya kini ki tiar da ekti da u Secretary ka seiñ, u C. Sungoh heiwa neiliang kiwa pynlai ya kani ka thaw uwa man leh kam u Chairman yong ka, u Seven Dar Dkhar da pdiang sñiawbha u ya kini ki tiar hei emlang u J. Phawa, u President yong ka seiñ.
Ka seiñ da e ko ya kini ki tiar kam wow yarap wa i sñiawngooh ya kani ka Center neibhah i e sikai mynkna ko ya ki khon khynroo khyllood yong ka Ri-loom Jaiñtia heiyatoh wa ki Exam DSC, MTET, MPSC wa kiwi kiwi.
Ka seiñ kitbok kitrwiang ko leh ya kani ka Coaching Center wow nang ku ko chakhmat ha ki kaam wa bha kamjooh leh wow e i chakri wa hok ya ka ri waka jaitbru.
