Jowai: Ka Bharatiya Janata Party, Meghalaya Pradesh da yaroh ko ya u montri rangbahdooh ka ri u Narendra Modi wa ya ki montri yong oo kiwa haka sien nyngkong wa yachem ki da chim ki yaka rai wow pynyar yaka PM-KISAN Scheme yow yoh myntoi kamwa da kular ya ki warep wow su cha ki T. 6000 chi snem haki le bynta cha waroh ki warep kiwa em kamwa 15 klur ngut. Da chim leh yaka rai wow pynlait yaka Pension Scheme ya kiwa khayi kiwa em hadooh 3 klur ngut wa kynthup ya kiwa chong dai dukan.
Da pynbna leh yaka Scheme wa thymme ka sorkar pyrdi kawa tip kam ka Pradhan Mantri Kisan Pension Yojana kawa man ka Pension Scheme ya ki warep wa khian wa nai kawa man leh kawa chong hei kwah ki warep wow yoh yaka.
Ya kiwa kwah yakani ka Scheme ka sorkar neiliang yong ka u su ko katkam ka poisa wa thap ki warep.
Hakni ka Pradhan Mantri Kisan Pension Yojna, u Union Minister of Agriculture & Farmer Welfare, u Narendra Singh Tomar da pynbna u wa ki warep ha ki thaw wa khian hadooh 2 Hectare hapoh ka ri daw yoh ki T. 6,000 chi snem. Wei ka Scheme kawa da em chwa daw yarap ko ya ki 12.5 Klur ngut ki warep wa ha ki thaw wa khian.
Da pynkylla leh yaka PM Scholarship Scheme heiwa ki khon ki pulit kiwa da dooh ya u pa namo ka bei deiwa chah pynyap ha ki por wa kreh ki ha ki seiñ keiñ suloi daw yoh ki yaka Scholarship wa heh.
Yaka Prime Minister’s Scholarship Scheme hapoh ka National Defence Fund da pynku naka T. 2000 chi bnai ya ki chnyrang chaka T. 2500 katwa yaki kynthai won da pynku naka T. 2250 chi bnai chaka T.3000 chi bnai.
Ka Bharatiya Janata Party, Meghalaya Pradesh da kam ko wa kam yaka jylla wa khian daw yoh myntoi bha ko na kini waroh.
Discussion about this post