Ka Hynniewtrep Integrated Territorial Organization (HITO) seiñbei da e khublei ko ya ka yung krehkaam ka Deputy Commissioner East Khasi Hills District, Shillong neidaw wa da pynmih ko ya ka hukum ha i ktien Khasi hawa yatoh wa i pynkrehkaam yaka Curfew hapoh ka District kiwa nachwa ki hukum toh kiwa da pynmih bait ha i ktien English.
Ka HITO da ong ko wa ini pynyoo yei burom yei ktien yong i hi, deiwa pynrap wa da yooluti wa ini u man ko ka nongmuna khamtam hapoh ka Bri u Ynñiawtrep wei kamjooh leh yaki arylli ki Autonomous District Council wow kheiñkor wei burom ya i ktien yong idæ iwa daw yarap leh chiboon ya kiwa chong chnong wow sñaiwthooh che ya kiwon kiwon ki pynbna wa emkaam yong ka sorkar wei daw pynyoo ko leh cha kiwi ki jaitbru wa i leh em i ka yong i hi i ktien wei man ko leh kam chibynta wow pynkyrsu thiah yaka sorkar India yow pynpsiah ya i ktien Khasi hapoh ka 8th Schedule ka riti synchaar ka ri.
Ka seiñ da dawa ko leh wow pynman ya ka Khasi kam ka Compulsory Subject ha waroh ki skur wei emkaam wow rwai ya ka Khasi Anthem ‘Ri Khasi Ri Khasi’ la toh ki skur sorkar ne ki skur wa pynlai da ki bru samen kam i dak wow burom yei man tynre yong ki.
Ka seiñ da kyntu ko leh ya ka sorkar jylla wow booddien yei dawa wow pynpsiah noh ya i ktien Khasi ha ka 8th Schedule deiwa kyrpaad leh ya waroh ki paradoh parasnam ka Bri u Ynñiawtrep wow bood ya ini i nongmuna ka Deputy Commissioner ka East khasi Hills District.
